भांगरभूंय | प्रतिनिधी
मुख्यमंत्र्यांच्या शिटकावणेचो परिणाम; हॉटमिक्स डांबरीकरणाकूय नेटपणजीः गोंयांतल्या रस्त्यांच्या बाबत दर्ज्या विशीं कांय दिसां आदीं ‘कारणां दाखयात नोटीस’ जारी केल्ल्या 27 कंत्राटदारांनी आनी 30 अभियंत्यांनी सरकाराच्या सुचोवण्यां प्रमाण बाबत रस्त्यांचेर काम सुरू केलां. देखून कोणाचेरूय कारवाय जावंक ना. कांय वाठारांनी काम पुराय जालां. शुक्रारा आमच्या प्रतिनिधी कडेन उलयतना भौशीक बांदकाम खात्याचे मुखेल अभियंतो उत्तम पार्सेकार हांणी ही म्हायती दिली.
तेच प्रमाण राज्यांतल्या भितरल्या रस्त्यांचेर वाहिनी घालपा खातीर रस्ते खणल्यात. तांच्या कामांकूय आतां नेट आयलां. भितरल्या रस्त्या कुशीक चालू आशिल्ल्या वाहिन्यांच्या कामांक लागून कांय कामां प्रलंबीत आसात अशी म्हायती तांणी दिली. अंदूंच्या पावसाळ्यांत राज्यांतले रस्त्यांच्या दर्ज्या विशींचो प्रस्न मुखार आयलो. पावसाळ्या पयलीं बांदिल्लें चडशा वाठारांतले रस्ते पावसाक लागून व्हांवून गेले. जाल्यार कांय रस्त्यांचेर फोंडकुलां पडिल्लीं. वाहन चालकांक ताचो फटको बसपाक लागले उपरांत तांणी सरकारा आड तिडक उक्तावंक सुरवात केली. हे संबंदीं कागाळी वाडूंक लागले उपरांत मुख्यमंत्री डॉ. प्रमोद सावंत हांणी पीडब्ल्यूडीच्या अधिकाऱ्यांची बसका घेतली आनी रस्त्यांचें काम करपी कंत्राटदार आनी अभियंत्यांचेर फोग काडलो आनी शिटकायले. ते उपरांत पयल्या टप्प्यांत 27 कंत्राटदारांक ‘कारणां दाखयात’ नोटिसो जारी केल्यो. इबाडिल्ले रस्ते संबंदीत कंत्राटदारांनी स्वताच्या खर्चान दुरुस्त करचे. फुडल्या पांच वर्सां खातीर रस्त्याची जापसालदारकी तांणी घेवची, अशी सुचोवणी तांणी जारी केल्ली आनी सुचोवण्यांक पाळो दिवंक नाशिल्ल्या कंत्राटदारांक काळ्या वळेरेंत घालपाचीय शिटकावणी दिली.
कंत्राटदारां उपरांत मुख्यमंत्र्यांनी अभियंत्यांकूय शिटकायले. 30 अभियंत्यांक ‘कारणां दाखयात’ नोटिसो जारी करून तांकां बाबत रस्त्यांक जापसालदार धरले. ह्या अभियंत्यांची चवकशी दक्षता खात्या वतीन करची आनी दोशी आशिल्ल्या अभियंत्यांचो पगार वाड आनी बडटी आडावची अशी शिटकावणी तांणी दिल्ली. सरकारान पयलेच खेपे बाबत दर्ज्या संबंदीं अशें शस्त्र उबारिल्ल्याचो भंय आशिल्ल्यान पावस उणो जातकच झुजा पांवड्यार बाबत बांदिल्ल्या रस्त्यांचेर कंत्राटदार आनी अभियंत्यांनी परतून काम सुरू केलें. चडश्या कंत्राटदारांनी पावसाच्या दिसांनी बांदिल्लें रस्ते दुरुस्त करपाक तशेंच स्वताच्या खर्चान डांबरीकरण करपाक सुरवात केल्या. कांय वाठारांनी भितरल्या वाहिन्यांचे काम चालू आसा. हे खातीर रस्ते खणल्यात. ते खातीर त्या रस्त्यांचें काम प्रलंबीत आसा असोय उल्लेख पार्सेकार हांणी केलाे.
……………………………………………………….
भितरल्या रस्त्यांचेर वाहिन्यांच्या कामाकूय नेट
वीज आनी उदका संसाधन खात्याक रस्ते आनी भितरल्या वाहिनीचें काम बेगीनांत बेगीन पुराय करपाची सुचोवणी जारी केल्या. रस्त्यांचेर हॉटमिक्स डांबरीकरण केले उपरांत खंयच्याच खात्याक रस्ते खणपाक मेळचे नात अशेंय तांकां सांगलां. देखून ह्या खात्यांनी भितरल्या रस्त्या वयल्या वाहिनी घालपाच्या कामांक नेट दिल्ल्याचे उत्तम पार्सेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
