भांगरभूंय | प्रतिनिधी
शिऊर, खबरां संस्था: कांबळी विकपा खातीर आयिल्ल्या मध्य प्रदेशांतल्या चार तरणाट्यांक जड लोखणाच्या प्लेटीं पोंदाक चिड्डून जाग्यारूच मरण आयलें.. ही घडणूक सोमारा (२७ जानेवारी) रातच्या १०.३० वरांचेर छत्रपती संभाजीनगर- मालेगांव महामार्गार घडली. दिवाण मानसिंग गरासिया (२५), विजय कंवरलाल गरासिया (२२), विक्रम कछवा (२०, हे तिगूय, निमच), निर्मल राजूजी गरासिया (२१, निमच, मध्य प्रदेश) अशीं मरण आयिल्ल्यांचीं नांवां आसात
पुलिसांनी दिल्ले म्हायती प्रमाण, घडणुकेंतले चौगजाण आनी फिर्यादी अनिल पप्पूजी गरासिया (२३ रा. खडावदा) हे तीन म्हयन्यां आदीं आपल्या पोटा फाटल्यान मायभूंय सोडून तामिळनाडूंत ब्लँकेट विकपा खातीर गेल्ले. मजगतीं, गिरायकांनी प्रतिसाद दिवंक नाशिल्ल्यान तांणी कर्नाटकांत कांय दीस पलंग विकपाचो वेवसाय केलो. पलंगांचो सांठो सोंपोवन त्या चवगांनीय आपल्या गांवां मध्य प्रदेशाक वचपाचो निर्णय घेतलो. मजगतीं, मध्य प्रदेशांतल्या लागसारच्या म्हालांतलो एक माल व्हरपी कंटेनर गांवाकडे वता अशी म्हायती तांकां मेळिल्ली. उपरांत संंबंदीत कंटेनराच्या ड्रायव्हरा कडेन तांणी संपर्क केलो आनी २२ टायरांच्या कंटेनरान (आरजे ०९ जीडी ३८५३) घरा परतपाक ते भायर सरले. कांय अंतराचेर विजय, निर्मल, दिवाण आनी विक्रम हांकां न्हिद येवपाक लागिल्ल्यान ते गाडयेच्या फाटले वटेनच्या भागांत न्हिदपाक गेले. ते चवगूय सुस्त न्हिदेंत आसतना ड्रायव्हरान ब्रेक मारले तेन्ना गाडयेंत आशिल्ल्यो जड लोखणाच्यो प्लेटी न्हिदिल्ल्या त्या दोवगांच्याय आंगार पडल्यो आनी तांकां जाग्यारूच मरण आयलें. गाडयेच्या फाटले वेनच्या व्हड आवाज आयिल्ल्यान वाहनचालक सुरेश गुर्जर हांणी वांगडा आशिल्ल्या अनिल हाका कोणायकूय फोन लावन कसलो आवाज आयलो काय विचारपाक लायलें. अनिलान विजयाक फोन केलो. मात तांणी फोन घेवंक ना. उपरांत गाडी थारावन ते दोगून फाटल्यान पळोवपाक गेले तेन्ना ते प्लेटी पोंदाक चिड्डल्ल्याचें समजलें.
घडणुके पयलीं त्या चोवगांनीय रील्स व्हिडियो केल्लो
ही घडणूड घडच्या कांय वरां पयलीं दिवाण आनी विक्रम हांणी ह्याच वाहनांतल्यान रील्स व्हिडियो तयार करून आपल्या इन्स्टाग्रामाचेर पोस्ट केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
