भांगरभूंय | प्रतिनिधी
औ रंगजेब मरून 318 वर्सां जालीं, मात ताच्या नांवान आयजूय जाळपोळ, दंगल जाता, ही दुर्दैवी गजाल. नागपूरांत सध्या जें घडटा, तें पळयल्यार औरंगजेबा वेल्यान राजकारण करून कोणाक लाव जातलो काय? हो प्रस्न पडटा.
‘छावा’ चित्रपट प्रदर्शीत जालो तसो औरंगजेब परतून जिवो जालो. थेटरांतल्यान भायर सरताच जो-तो औरंगजेबाच्या नांवांन बोटां मोडटालो. ह्या चित्रपटांत औरंगजेबाची क्रुरता खुबूच उण्यां प्रमाणांत दाखयल्या. मात, अक्षय खन्नान ती भुमिका इतले प्रभावी रितीन साकारल्या की औरंगजेब असोच क्रूर आशिल्लो म्हूण सगल्यांच्या मनाक पटलां. चित्रपट पळयतना कांय जाणांनी थेटरांचे पड्डेय पिंजले. इतली बरी भुमिका ताणें केल्या. जांणी छत्रपती संभाजी महाराज हांचेर आधारीत पुस्तकां वाचल्यांत तांच्या लक्षांत येतलें, चित्रपटांत महाराजांचो अंत दाखयला तो पुस्तकांनी आसा ताच्या एक टक्कोय ना. तेन्ना महाराजांचो कितलो छळ केला आसतलो हाचो अदमास येतलो.
हो चित्रपट आयले उपरांत औरंगजेबा विशीं खूबशा जाणांच्या मनांत राग उजो जावन धगधगतालो. तातूंतच नागपूरांत अचकीत औरंगजेबा वेल्यान वाद सुरू जालो आनी आतां तो चडार पडलो.
औरंगजेबाची समाधी, दर्गो वा थडगें म्हणात तें काडून उडयात, थंय ताची कसलीच निशाणी नाका म्हूण हिंदू संघटणा मागता. दुसरे वटेन औरंगजेबाचें थडगें काडटा म्हूण एक विशिश्ट समाज बोवाळ घालपाक लागला. ह्या बोवाळांत महाराष्ट्र सरकार कातरेंत सांपडलां.
थंयचे मुख्यमंत्री देवेंद्र फडणवीस म्हणटात लोकांक जाय तें आमकांय जाय, मात औरंगजेबाचें तें थळ पुर्विल्ल्या स्मारकांचें संवर्धन कायदो, 1904 आनी प्राचीन स्मारकां आनी पुरातत्वीय थळां आनी अवशेश कायदो, 1958 (एएमएएसआर कायदो) हांच्या संबंदीत तरतुदी खाला हें थळ राष्ट्रीय म्हत्वाचें थळ म्हूण जाहीर केलां. तेन्ना महाराष्ट्र सरकार कांयच करूंक शकना. कितें तें केंद्र सरकारूच करपाक शकता. तांच्या ह्या उलोवपान महाराष्ट्र सरकाराची हतबलता स्पश्ट जाता. ताचेर उध्दव ठाकरेच्या शिवसेना गटान हात धुंवून घेतले. महाराष्ट्र सरकार कांयच करिना म्हूण तांणी सूर लावन धरला.
महाराष्ट्र भाजपान औरंगजेबाचें थडगें थळाक राष्ट्रीय म्हत्वाचें थळ म्हूण नामना दिवपा फाटल्यान काँग्रेसीचो हात आसा, तांच्या काळांतूच हें जालां म्हूण सांगून ह्या वादांत काँग्रेसीकूय ओडल्या. मात, काँग्रेसीन अजून मेरेन तरी ह्या वादांत उडी घेवंक ना. काँग्रेस फुडारी नाना पटोले हांणी हो विशय विधानसभेंत चर्चेक हाडुया अशें म्हणीत तातूंतल्यान सध्या तरी आंग मारलां.
हेर काँग्रेस फुडारी आनी उद्धव ठाकरे शिवसेना गटान ह्या घडिल्ल्या प्रकाराक महाराष्ट्र सरकारूच जबाबदार आसा म्हूण सांगून नागपूरांतल्या उज्यांत हात शेकून घेतल्यात. उद्धव, आदित्य ठाकरे हांणी तर महाराष्ट्रांत मणिपूरा सारखी परिस्थिती निर्माण जाता म्हूण सांगून परिस्थिती खुबूच गंभीर आसा हें सांगपाचो यत्न केला. नागपूरांत अचकीत निर्माण जाल्लो हो वाद थारावन केला अशें फडणवीस हांणी सांगून हातूंत राजकारण आसा असो सूक्ष्म संदेश दिलो. महाराष्ट्राच्या इतिहासांत आनीक एका काळ्या घडणुकेची भर पडल्या इतलें मात ह्या नागपूर प्रकरणांतल्यान म्हणूं येता. संभाजीनगरांतल्यान औरंगजेबाची निशाणी काडून उडोवप तशें सोंपें ना. कित्याक तर ताचेर वोट बँकूय निंबून आसतली. हाचेर उद्धव ठाकरेन बोट दवरलां. एकूण परिस्थिती तशी गंभीर जायत आसा.
इतिहासाचें संशोधन करपाचें काम संशोधकांचें, तातूंच राजकारण्यांची कांयच भुमिका ना, अशी महाराष्ट्र सरकाराची भुमिका आसा. मात, राजकी पक्ष नागपूरांतले घडणुकेचेर आपलीं मतां मांडीत आसात. परिस्थिती हाताळपा खातीर खरें म्हणल्यार सगल्यांनी एकठांय येवपाची गरज आसा. संभाजीनगरांत फाटलीं 318 वर्सां औरंगजेबाचे थडगें आसा. ब्रिटीश काळांतूय ताचे वेल्यान वाद जावंक ना. भारत स्वतंत्र जाले उपरांतूय तें काडपाचो कोणाकूच विचार येवंक ना. भाजपा सरकारानूय ताका केन्नाच हात लावंक ना. जाल्यार आतां जो वाद जाला ताची कीट कोणे पेटयली हो प्रस्न आसा. सरकार ह्या गजालीच्या मुळा मेरेन वचपाचो यत्न करता. तांकां तांचें काम करूंक दिल्यार वाद बेगीन थंड जावपाक शकता. मात, विरोध करपाक जाय म्हूण करप बरोबर न्हय.
केंद्रीय संस्कृती मंत्रालया खाला येवपी एएसआय, कांय इतिहासीक वास्तू आनी पुरातत्वीय थळांचें संरक्षण आनी राखण करपाची केंद्राची जापसालदारकी आसा. गोंयांतूय जायत्या दायज वास्तूंचो एएसआय वतीन सांबाळ जाता.
एएसआयन देशभर सांबाळून दवरिल्ल्या आनी सांबाळून दवरिल्ल्या गिरेस्त दायजांत राजवाडे, किल्ले, इतिहासीक खडपांचें आलाशिरे, नवाश्म युगांतलीं थळां, फातरांनी कापिल्ल्यो लेणी, स्तूप, महापाेशाण, आदल्या काळांतलीं देवळां, इगर्जी, सिनेगॉग (ज्यू लोकांची प्रार्थना थळां), मशिदी, थडगीं, न्हावपाचे घांट, टांकयो, उदकाचे सांठे, पूल आनी हेर गजालींचो आस्पाव आसा. हांगा 3,697 पुर्विल्लीं स्मारकां आनी पुरातत्वीय थळां आनी अवशेश आसात जे सध्या एएसआयन सांबाळून दवरल्यांत, अशें केंद्रीय मंत्रालयान फाटल्या डिसेंबरांत जारी केल्ल्या प्रसिद्धी पत्रकांत म्हणलां.
एएसआयन सांबाळून दवरिल्लीं दायजां मागीर ती वायट गजालींची याद करून दिवपी आसूं वा बरो इतिहास सांगपी आसूं ती राज्य सरकार काडपाकूच शकना.
आतां लोकांक नाका जाल्यार वायट घडणुकांची याद करून दिवपी वा भारतीय इतिहासांत खलनायक थारिल्ल्यांचीं थडगीं वा तांच्यो वास्तू पुरातत्वीय संरक्षण, राखण प्रकारांतल्यान काडूं येता काय? असो सगल्यांकूच प्रस्न पडला आसतलो. काडपाक जाता. पोरूं मार्चांत एएसआयन अशीं 18 दायजां, तीं मेळनात म्हूण सांगून वळेरेंतल्यान काडपाचो निर्णय घेतला. ताचेर अजून काम जावपाचें आसा. ज्या थळांक भारतियांचे नदरेन म्हत्व ना तिंवूय काडपाचो निर्णय जाल्यार कोणाकूच चुकीचे दिसचें ना.
नागपूरांत सध्या जें चल्लां तें पळयत जाल्यार कोण योग्य? कोण अयोग्य? म्हणचें परस मेल्ल्या मड्याचे ताळवे वेलें लोणी कोण खावपाक सोदता हो प्रस्न आसा. आपल्या भाशणांतल्यान लोकांक भडकयता म्हूण पुलिसांनी मायनोरिटीज डॅमॉक्रॅटीक पार्टीचो मुखेली फहीम खान हाका धरला. तशेंच हेर 70 जाणांकूय ताब्यांत घेतल्यात. भारताच्या इतिहासांत खलनायक आशिल्ल्या औरंगजेबाचें थडगें सांबाळपाक सध्या थंय कर्फ्यू भशेन परिस्थिती आसा. औरंगजेबाक मानपी लोक आसात, हें परतून एकदां सिद्ध जालें. महाराष्ट्र सरकारान निर्णय घेवपाक आमी सक्षम ना म्हूण सांगून हात वयर केले. आतां केंद्र सरकार ही परिस्थिती कशी हाताळटा ताचेर सगल्यांचे लक्ष आसा.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
