भांगरभूंय | प्रतिनिधी
म्हादयचें उदक आपले वटेन वळोवपाचो कर्नाटकाचो यत्न चलतना आतां महाराष्ट्र सरकारान विर्डी धरणाचें काम चालू केलां. समर्थक म्हणटात, म्हादय (मांडवी), विर्डी (व्हाळवाट) न्हंयेचेर व्हडलोसो परिणाम जावचो ना, तर विरोधकांचें म्हणणें दोनूय न्हंयो आट्टल्यो. ताचे पयलीं गोंयच्या कांय तालुक्यांतल्या लोकांचो ताळो मात उदका विणें सुकला. हालींच बांदकाम मंत्री नीलेश काब्राल हांणी चांदेल प्रकल्पाक भेट दिली. फुडल्या म्हयन्यांत ताचो विस्तारीत वांटो पूर्ण जातलो. 14 टांकयो बांदल्यात. उरिल्ल्या 10 टांकयांक सुवात मेळ्ळी जाल्यार एका वर्सा भितर सगल्याची उदकाची समस्या सोडयतां. नाजाल्यार मंत्रीपदाचो राजिनामो दितां, अशी भीष्मप्रतिज्ञा तांणी केल्या. हाचे आदीं वर्सा भितर रस्त्या कुशीचें प्लास्टिक ना करतले, भ्रश्टाचार, ड्रग्स सोंपयतले, रस्त्यार फोंडकुलां दिसचीं नात…. अश्यो साबार घोशणा जाल्यात. तातूंतलीच ही एक, काय कितें तें फुडल्या शिगम्या मेरेन कळटलें. आतां बाॅल पेडणेंच्या पालिका आनी पंचायतींच्या हातांत आसा. तांणी मिर्गा पयलीं उरिल्ल्या टांकयांक जागो दिवचो आनी नीलेशबाबाक तांचें उतर खरें करपाची संद दिवची.
शिगम्याक धोलार तोणी पडली काय गोंयांत साबार कडेन नळूय सों सों फों फों करीत तालगडी खेळपाक लागतात. गोंयांतल्या भोवतेक वाठारांनी धरणां आसात. आनीक तीन प्रकल्प म्हादय न्हंयेचेर येवपाचे आसात. तरीय उदकाची टंचाय गोंयकारांक सतायता. मांद्रें, पेडणें मतदारसंघांनी उदकाची समस्या गंभीर जाल्या. वचत थंय आमदारांक आयकून घेवचें पडटा. ताकाच लागून काब्राल हांणी चांदेल प्रकल्पाक भेट दिल्ली. ताचो विस्तार करतना जमीन संपादीत करूंक ना. देखून टांकयो बांदकाम मेळनात. जमीन धनयांक योग्य मोबदलो दिवपाचें थारलां. उरल्यात त्यो टांकयो उब्यो जाल्यो जाल्यार दिसाक चार वरां उदक मेळटलें, अशें काब्राल हांणी सांगलां. तरीय एक प्रस्न उरताच. तो म्हणल्यार 14 टांकयो बांदून जाल्यात तातूंत उदक कित्याक ना? संबंदीत उदका पुरवण अधिकाऱ्यां कडेन हाची जाप आसतली. ह्या प्रकल्पांतल्या नेमकें कितलें एमएलडी उदक भायर सरता, खंय खंय वता, ताचेरुय उजवाड पडल्यार बरो. कारण लोक म्हणटात, उदक मेळना. उदका माफियांचें बी हांगा कितें कनेक्शन आसा?
गोंयांत उदकाची परिस्थिती तशी कठीण आसा. तेवटेन आशिल्ले उदकाचे स्रोत इबाडत आसात. तळयो, बांयो, व्हाळ काबार जावपाच्या मार्गाचेर आसात. तांकां पुनरुज्जीवन दिवपाचो यत्न करतले, अशें सरकारान हालींच जाहीर केलां. सरकारा परस गांवच्या स्वराज संस्थांचेर चड जापसालदारकी आसा. तेच बांयो, तळ्यांक, न्हंयांक नवें जीवन दिवपाक शकतात. त्या उदकाचो वापर गांवा पुरतो करपाक मेळ्ळो जाल्यार दुदांत साकर. उदकाची बचतूय प्रत्येकाक करची पडटली. गोंयची लोकसंख्या वाडत आसा. फुडाराक आमकां मेळटा तितलें उदक उणेंच आसतलें, हें मतींत घेवन पावलां उडोवची पडटलीं.
खर ख्यास्त दिवची
अन्न आनी वखदां प्रशासनान म्हापश्यां रसायन लावन पिकयिल्लीं 800 कील केळीं जप्त केल्यांत. तें रसायनूय जप्त केलां. वेपारी अशें कित्याक वागतात तें कळना. गोंयांत म्हारगाय आसा, जगपाक चड पयसो लागता. सगल्यांकूच बेगीन गिरेस्त जावंक जाय….. ही गजाल खरी. पूण, ते खातीर कायदेशीर मार्ग आसात. गोंयांत दुयेंसां, रोगांचें प्रमाण वाडलां ताचे फाटल्यान हे असले वेपारी जापसालदार आसतले. कड्डणांनी, तेलांत भेसळ कर, दुदांत शांपू मिस्तुराद कर, नुस्त्याक फाॅर्मेलीन लाय, कृत्रिम रंग, मेण वापरुन फळां चकचकीत कर, रसायनां लावन तीं बेगीन पिकय…. सगलेच जाण झटपट पयशेकार जावपाक सोदतात. घाम गळोवपाचो, फांतोडेर उठून कश्ट करपाचे, मध्यानरातीं दूद, भाजी, नुस्तें हाडपाक वचपाचें…. तरातराचीं कामां करून लोक जगतात. सगल्यांकूच रातयां पयसो मेळना. पूण हाचो अर्थ गैरप्रकार, गुन्यांव करून गिरायकांक त्रासांत उडोवप बरें न्हय. देवाक मानपी लोक पसून हें करूंक लागल्यात.
आतां उदक गळ्या मेरेन आयलां. अन्न आनी वखद प्रशासनान दिसपट्ट्यो धाडी घालपाक खास यंत्रणा सुरू करची. पेडणें ते काणकोण मेरेन पुलीस गस्त घालतात, तशें तांणीं सद्दां भोवून वेपाऱ्यांचे गैरप्रकार सोदपाचे आनी तांकां ख्यास्त करपाची. चीनांत खाणांच्या जिनसांच्या दर्जा कडेन कोणूय खेळटा आनी तो दोशी सिद्ध जालो जाल्यार ताका जल्मठेप, फांशी पसून जाता. जमल्यार आमच्या देशांतूय हो कायदो बेगीन हाडचो. ताचे बगर हे वसवशे वेपारी जाग्यार येवचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
