भांगरभूंय | प्रतिनिधी
म्हापशें ः ओशेल- शिवोले फ्लॅटांत शंकर कृष्णप्रसाद चौधरी उर्फ के. पी. चौधरी (४४) ह्या तेलगू चित्रपट निर्मात्यान गोळ घेवन आत्महत्त्या केली. ड्रग्स तस्करी प्रकरणांत तेलंगण पुलिसांनी जून २०२३ त ताका अटक केल्ली. टॉलिवूडांत ‘कबाली’ ह्या चित्रपटाची चौधरी हांणी निर्मिती केल्ली.
ही आत्महत्येची घडणूक सोमार ३ फेब्रुवारीक सकाळीं ११.३० वरांचेर उक्तडार आयली. के. पी हे सकाळीं फ्लॅटांतल्यान भायर येवंक नाशिल्ल्यान ताच्या शेजारच्या फ्लॅटांतल्यान मनशान दारार मारलें. मात फ्लॅटांतल्यान कसलोच प्रतिसाद मेळूंक ना. हाका लागून त्या मनशाक फ्लॅटाच्या धनयाक फोन केलो. धनी घडणुके सुवातेर आयले उपरांत फ्लॅटाचें दार उगडलें. तेन्ना चौधरी हो गोळ लायिल्ले अवस्थेंत सांपडलो. नायलॉन दोरी आनी बॅडशीट फॅनाक बांदून आत्महत्त्या केली.
हे घडणुकेची म्हायती मेळटांत हणजूण पुलीस घडणुके सुवातेर पावले. पुलीस उपअधीक्षक संदेश चोडणकार आनी निरीक्षक सूरज गांवस हांणी घडणुके सुवातेर भेट दिवन पळोवणी केली. पुलीस उपनिरीक्षक साहील वारंग हांणी पंचनामो केलो आनी ताची कूड पोस्टमार्टमा खातीर गोमेकॉंत धाडली.
फाटल्या ७ म्हयन्यां सावन चौधरी शिवोले रावताले. रिणांत पडून, अर्थीक परिस्थिती इबाडिल्ल्यान मानसीक ताणांतल्यान तांणी ही आत्महत्त्या केल्ली आसतली असो अदमास पुलिसांनी उक्तायला.
मजगतीं, के. पी. चौधरी हांकां १३ जून २०२३ क किस्मतपूर- हैदराबादाक तेलंगणा पुलिसांच्या विशेश चवकशी पंगडान ड्रग्स तस्करी प्रकरणांत अटक केल्ली. ताचे कडेन ८२.७५ ग्रॅम कोकेन सांपडिल्लें. ह्या प्रकरणांत जामीनाचेर सुटले उपरांत तांणी गोंयांत येवन शिवोले आसरो घेतिल्लो.
मजगतीं, कबाली ह्या चित्रपटाची निर्मिती केले उपरांत के. पी. रिणांत पडिल्लो. हाका लागून तो ड्रग्सच्या वेव्हारांत देंवलो. गोंयांत वागातोरा ताणें एक पब सुरू केल्लो. थंयच्यान के. पी. सिलेब्रीटींक ड्रग्सची पुरवण करतालो, असो दुबाव तेलंगण पुलिसांनी तेन्ना उक्तायल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
