भांगरभूंय | प्रतिनिधी
भांगरभूंय । प्रतिनिधी
शिवोलीः आशेल हांगा व्हांवन गेल्ल्या शेताच्या बांदाची तात्पुरती दुरुस्ती करपाचें काम शुक्राराक दनपारां सुरु केलें. शिवोलेची आमदार डिलायला लोबो हिणे बांदाची पळोवणी करून तो सारको करपाचें काम सुरू करपाची सूचोवणी केली.
फाटल्या बिरेस्तारा सकाळीं शापोरा न्हंयेचे देगेर आशिल्ल्या ह्या बांदाक खांवटें पडलें आनी शेता खाऱ्या उदकान भरलें. रातयां आशेल, वागाळी आनी खैराट वाठारांत हें उदक पावल्लें. ह्या वाठारांत लोकांनी मिरसांगो आनी भाजयेचीं पोरसां केल्ल्या तांचे मदीं हुस्को पातळ्ळो. आमदार डिलायला लोबोन ओशेलचो सरपंच प्रवीण कोचरेकार, शेतकार समितीचो अध्यक्ष संजय शिरोडकार वांगडा वचून बांदाचो पळोवणी केली
सध्या बांदाची तात्पुरती दुरुस्ती करतले उपरांत मानशी सांवन 500 मीटर लांबायेची राखणे वणट बांदतले अशी म्हायती लोबोन दिली. शापोरा न्हंयेचें उदक शेंतात रिगल्ल्यान शेतकारांचें लुकसाण जालां. मात ते खातीर सरकारी मजत दिवपाची सरकारी येवजण ना. पावसाच्या उदकाक लागून लुकसाण जाल्यार सरकार अर्थीक मजत दिता अशें बार्देशाची कृशी अधिकारी संपत्ती धारगाळकार हिणे आपल्याक सांगलें. बांदाच्या उदकान लुकसाण जाल्यार ताची भरपाय मेळपाक जाय. व्हो विशय आपूण विधानसभेंत मांडटलें अशें लोबोन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
