भांगरभूंय | प्रतिनिधी
विजय सरदेसायः हायमास्ट दिव्याचें उक्तावण
भांगरभूंय । प्रतिनिधी
मडगांवः ओल्ड मार्केट वाठार हें इतिहासीक दायज. ओल्ड मार्केट ह्या इतिहासीक वाठारांत लोकांक वांगडा घेवन ह्या वाठाराचे उदरगतीचो आराखडो तयार केल्लो. आपूण मंत्री आसतना आनी मनोहर पर्रीकार मुख्यमंत्री आसतना ह्या वाठाराच्या उदरगतीच्या कामां खातीर सुमार 5 कोटी रुपया खर्च करपाचे आशिल्ले. जीएसआयडीसी कडल्यान हीं कामां चालीक लागचीं, हे खातीर आपूण यत्न करतलों, अशें आमदार विजय सरदेसाय हांणी सांगलें.
मडगांवच्या ओल्ड मार्केट वाठारांत उबारिल्ल्या हायमास्टाचें उक्तावण आमदार सरदेसाय हांचे हस्तुकीं जालें. ह्या वेळार ते उलयताले.
पर्यटन खात्याच्या निधींतल्यान हें काम केलां. ह्या दायज वाठाराची उदरगत करचे खातीर लोकांक वांगडा घेवन उदरगत कामांची आंखणी केल्ली. तातूंत खाजगी जमनींतल्या उदरगतीच्या कामां खातीर सरकारी तिजोरेंतले पयशे कशे खर्च करतले, हो मुद्दो आशिल्लो. ताचेर लेगीत मंत्रीमंडळांत एक निर्णय घेतिल्ल. ताका लागून जीएसआयडी कडल्यान ह्या वाठारांतलीं उदरगतीचीं कामां करून घेवचे खातीर यत्न करतां, अशें सरदेसाय हांणी सांगलें. फातोड्डें वाठारांत आनीक तीन ते चार हायमास्ट उबारतले. एक हायमास्ट उबारपाक सुमार 10 लाख रुपया खर्च येता. ओल्ड मार्केट वाठारांतलो हायमास्ट हो पर्यटन विभागाच्या निधींतल्यान उबारला. ताची देखभाल, दुरुस्तीचीं कामां पर्यटन विभागा वतीनूच करप गरजेचें आसा. पूण तशें जालें ना जाल्यार संबंदितां कडेन मागणी करतले. ओल्ड मार्केट वाठारांतले बागाचें काम परतून सुरू जावचें हे खातीर लेगीत यत्न करतलों. म्हायती अधिकारा खाला समाज वावुरप्यांनी म्हायती घेतली जाल्यार काम बंद करचें न्हय. सप्तकभरांत हाचेर निर्णय घेतले, अशेंय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
