भांगरभूंय | प्रतिनिधी
मडगांव: ओला इलॅक्ट्रिकचे मुखेल कार्यकारी अधिकारी भावेश अग्रवाल हांचे आड दक्षीण गोंय जिल्लो गिरायक कागाळ निवारण आयोगान जामीनपात्र वॉरंट जारी केल्या. गिरायक आयोगा कडेन दाखल आशिल्ले कागाळीचेर सेगीत नोटीस दिवनय ते सुनावणेक हाजीर रावंक नाशिल्ल्यान ही कारवाय केली.
प्रीतेश चंद्रकांत घाडी हांणी ’ओला इलॅक्ट्रिक टेक्नॉलॉजी प्रायव्हेट लिमिटेड’ आड दक्षीण गोंय जिल्लो गिरायक कागाळ निवारण आयोगा कडेन कागाळ दाखल केल्ली. ह्या प्रकरणांत भावेश अग्रवाल हांकां ह्यान पयलीं जायते फावटीं कायदेशीर नोटिसो धाडिल्ल्यो. मात, नोटीस मिळूनय तांणी आयोगा सामकार हाजेरी लावंक ना. हाका लागून मडगांवच्या दक्षीण गोंय गिरायक आयोगान आतां अग्रवाल हांकां आयोगा मुखार हाजीर करपा खातीर बंगळुरू शार पुलिसांक जामीनपात्र वॉरंट दिवपाचे निर्देश दिल्यात.
हे जामीनपात्र वॉरंट खातीर १,४७,४९९ रुपयांचो वयक्तीक बॉंड आनी तितलेच रकमेचो एक हमीदार सादर करचो पडटलो. आयोगान अग्रवाल हांकां २३ फेब्रुवारीक प्रत्यक्ष हाजीर रावपाचे दिल्ल्यान, तांचे हाजेरींत फुडली कायदेशीर कारवाय करतले.
ओला इलॅक्ट्रिकला ह्यान पयलींय गिरायक हक्क नेम मोडप, दिकाभूल करपी जायराती आनी निकृश्ठ सेवा ह्या कारणांक लागून केंद्रीय गिरायक संरक्षण प्राधिकरणा कडल्यान कारणां दाखयात नोटिसो मेळ्ळ्यात. तशेंच कंपनीच्या सर्वीस सेंटरांतल्या विस्कळीत कामाक लागून गिरायकां तिडकल्ल्याचें दिसू येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
