ओर्राद तोर्राद

भांगरभूंय | प्रतिनिधी

लोकांनी कितेंय म्हणूं. मडगांवच्या ज्यार्दिनाची रया गेल्या म्हूण नाकां मुड्डूं. पूण कितलीं दशकां हुलगलीं, आमी सांजे थंय सोप्यांचेर कुले तेंकोवन बसतातूच. आकांत खबरी केल्यात. तासंपट्टी केल्या. जगभरांतल्या खबरांचेर. विशयांचेर आयजूय हांव ज्यार्दिनाचेर असोच बशिल्लों. पयसुल्ल्यान एक कोंकणी लेखक पुस्तकांचो पेळो घेवन म्युनिसिपाल लायब्ररींत वतना पळेलो. वाचप ही बरीच गजाल. हांवें ना वाचूं. हे कॉपी मारीत म्हूण हुस्को जाता. कोण नाटकां कॉपी मारता, कोण नाटक सर्तीक खत लागलें म्हणटा. म्हणूं थंय. आय बाय वयर काडटात मराठी नेमाळ्यांनी.
हो पळे धनू आयलो. धनू – कोची रिटर्न. कोंकणी साहित्य संमेलन करून आयला. गड जिकून दिग्विजय पराक्रम करून आयिल्लेवरी इतिहासीक नाटकांतल्या राजावरी हड्डें फुडें.
धनू, बरे जालें मरे संमेलन? हांवें विचारलें. धनून तोंड अर्दें वांकडें, अर्दें चिड्डून हांशिल्लेंशें केलें.
लोक मरे कांदे जोखताले मदींमदीं. सायकॉलॉजींत स्ट्रुगर सिंड्रोम म्हूण आसता. Accordingly ते न्हिदतकच म्हाकाय लकणी येवपाक लागली.
धनू, बरें तें सांग रे. सकारात्मक बातम्यो.
तुगे तें पॉझिटीव थिंकींग. धनून काणकोणकारी एक्सेंट मारीत म्हाका कोंपर मारलो.
दादा मेळ्ळो रे.
हो दादा कोण. भाई, ताई, दीदी, भाऊ… कितलीं जाणां आसात रे?
विडियो पळे मरे कोचीचो. दादा एकूच. कितेंय उलोवं नाका रे.
पुस्तकां बी नवीं आयल्यांत?
आवयस. कितलींशींच. फार रे.
वाचतात मरे लोक पुस्तकां?
तूं मरे suddenly नेगेटीव जाता… धनू तापलो सो.
हांवें विचार केलो – पुस्तकांत जें ओरिजिनल आसता तें बरें आसना. आनी जें बरें आसता तें ओरिजिनल आसना. म्हणजेच चोरिल्लें वा उखलिल्लें आसता, अशें ए जी अस्टुरीयस ह्या ग्वातेमालाच्या फामाद लेखकान म्हळां. धनूलो फिलामेंट तापिल्लो. कोंकणीचें प्रोकुरसांव हाचेच कडेन आशिल्ले भशेन हो इमोशनल जाता जें ताच्या आरोग्याक पार्तीकुलार काळजाक अपायकारक. आसूं. पाड पडूं. वोगी रावप बरें.
कोचीची आनीक खबर सांग मरे.
खूब जाण मेळ्ळे. चकाटां मारलीं. थोड्यो नव्यो वळखी जाल्यो.
धनू, फाल्यांच्यान डिसेंबर लागता रे.
तातूंत कितें, दिवाळी जाली, इफ्फी जालो, पर्तगाळ सुवाळो जालो, नातलां येतलीं, नवें वर्स इवेंट… तें घुंवत रावता.
मेन उरलें तुजें….
कितें तें?
साहित्य अकादेमीचे पुरस्कार जाहीर जातले मरे ह्या म्हयन्यात…..
आरे सॉरी, विसल्लों. एकार एक चार. मुख्य, अणकार, बाल आनी युवा. चौगांक मेळटा. चाळीस जाणांच्या पोटांत मुड्डता, वळटा, दुखता.
धनू, हें मात तुजें बरोबर आं. जानोत.
म्हाका मेळ्ळेंना, ताका दिलें, एकूच पुस्तक आसतना तमक्याक दिलें…. हे आरोप आयकूं नजो जातात. धनू उलयलो.
सद्या तूं कितें वाचता तर धनू? ताच्या हातांतल्या दाट पुस्तकाक पळोवन हांवें विचारलें. धनूली इंग्लीश बरी. तींच पुस्तकां वाचता. बरयना तें एक बरें. नाजाल्यार चोरपाचो मोह जावपाचो.
सद्या हांव माय नेम इज रेड ही पामुकाची कादंबरी वाचतां. सॉलीड आसा रे. पानां पळे. नाजाल्यार भारतीय कादंबऱ्यो.
150 – 200 पानांच्यो दीर्घ कथा. हांवें म्हळें. धनू बेठोच फुल्लो. तो फटासो मारिना. पूण ओव्हर रीडींगाचो ताका अहंकार जडला. वाचनाचो येदो आवांठ नाशिल्ले सामके शांबळू, बोंडे अशें ताका एकेकदां दिसता. आसूं. मरूं. ताका सांगल्यार हळशीक जातली. वोगी रावलों.
धनू कडल्यान हांव खूब गजाली शिकतां. मागीर ताचीं आवटेपणां हांव विसरतां आनी तडजोड करतां. प्रकरण घात मारपी न्ही. फटींग न्ही. शेर्त. दॉस्सा (डोसा) तोवूय बी प्लेन हो ताचो आवडीचो. आज ताका कोचीची उर्जा चडिल्ली.
पेटोवया मरे सॅट डोसा आज?
सॅट डोसा मात्सो दाट आसता. प्लेन डोसा म्हणजे भारतीय साहित्य आनी सॅट डोसा म्हळ्यार संवसारीक अशें ताचें सिम्बॉलीझम. मनांत म्हळें ती उपमा मरूं. पोट म्हजें भरूं.
आरे, धनू म्हळ्यार धनवंत. ओर्राद. मनान लार्ग. तो आसतना हांवें केन्नाच बिल दिवंक ना. ताका आवडना तें. वाद घालूं, झगडूं, आमचें नातेंच अशें….

वासुदेव पै