भांगरभूंय | प्रतिनिधी
नवी दिल्ली, खबरां संस्थाः दर वर्सा ऑक्टोबर म्हयन्यांत दिसपी ‘ओरायनिड उल्कांचो शिंवर (Orionid Meteor Shower)’ अंदूं 21 ऑक्टोबराक चडांत चड जातलो. अवकाश निरिक्षक आनी नखेत्रां मोगीं खातीर ही एक आगळीच संद. तो 23 ऑक्टोबर मेरेन दिसतलो.
प्रसिद्ध हॅली धुमकेतूंतल्यान (Halley’s Comet) सोडून दिल्ल्या धुल्ल कणांक लागून हो उल्का पडटा. धर्तरी ह्या अवकाशीय पट्टेंतल्यान वता तेन्ना हे कुडके वातावरणांत भितर सरून मळबांत उजवाडाच्यो उल्का म्हणून चमकतात.
ओरायनिड उल्का शिंवर मध्यान रातीं उपरांत ते सकाळीं 4 ते 5 वरां मजगतीं पळोवपाक चड बरो दिसता. ह्यो उल्का दर सेकंदाक 66 किलोमीटर वेगान वतात आनी ताका लागून त्यो खूब चकचकीत आनी वेगान वतात. शारांतल्या दिव्यांच्या उजवाडाक लागून तो पळोवप कठीण जावं येता, देखून गांवगिऱ्या वाठारांत वा उजवाडाच्या प्रदुशणापसून पयस आशिल्ल्या वाठारांनी तो चड बरो दिसता.
‘ओरायनिड’ नांवाचें कारण
ह्यो उल्का खंयच्या दिकेन येतना दिसतात ती दिका ‘ओरायन’ नखेत्रांतल्या ‘बेटेलग्यूस’ (Betelgeuse) नखेत्राक लागीं आसा. देखूनच हाका “ओरायनिड” अशें नांव दिलां. ओरायन हें गिमाचें नखेत्र आसलें तरी ऑक्टोबरांत रातच्या इकरा वरां उपरांत उदेंत क्षितीजाचेर तें दिसता आनी सकाळीं दक्षीण-दक्षीणपूर्व दिकेन सगळ्यांत उंचायेचेर आसता.
संवसारभर दिसतलो
ओरायनिड उल्का शिंवर उत्तर आनी दक्षीण गोलार्धांत पळोवंक मेळटा आनी ताका लागून संवसारभर दिसपी थोड्याच उल्का मदलो हो एक. तो कांय दीस पळोवंक मेळटा. ताका लागून 21- 23 ऑक्टोबराचे रातीं हें दृश्य पळोवंक मेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
