भांगरभूंय | प्रतिनिधी
श्रीनगर, खबरां संस्था: जम्मू-काश्मीरांत १६ ऑक्टोबराक नवें सरकार स्थापन जातलें. नॅशनल कॉन्फरन्साचे ओमर अब्दुल्ला हे श्रीनगरांत मुख्यमंत्रीपदाचो सोपूत घेतले. सकाळीं साडेइकरा वरांचेर हो सुवाळो जातलो.
१० ऑक्टोबराक जाल्ले बसकेंत ओमर हांणी विधिमंडळ पक्षाच्या फुडारी पदाचेर निवड केल्ली. ११ ऑक्टोबराक तांणी राजभवनांत वचून एलजी मनोज सिन्हा हांणी भेट घेतली आनी सरकार स्थापनेचो दावो केलो.
ओमर अब्दुल्ला हांणी गांदरबल आनी बडगाम ह्या दोन सुवातांचेर वेंचणूक जिखली. ते गांदरबलची सुवात राखपाक शकतात. कुपवाडा हांगा अपेशी जाल्ले नसीर अस्लम वानी बडगाम हांगाच्यान परत वेंचणुकेक बसतले. आयतारा रातीं उसरां राज्यांतल्यान राष्ट्रपती राजवट काडपाचो आदेश जारी केलो. गृह मंत्रालयान सांगलें, राष्ट्रपती द्रौपदी मुर्मू हांणी नवीन मुख्यमंत्र्यांच्या सोपूत विधी पयलीं राष्ट्रपती राजवट काडपाचो आदेश जारी केलो.
जम्मू- काश्मीरांत निमाणी विधानसभा वेंचणूक १० वर्सां आदीं २०१४ त जाल्ली. वेंचणुके उपरांत भाजप-पीडीपीन युतीचें सरकार स्थापन केलें. २०१८ त भाजपान फाटबळ काडून घेतिल्ल्यान आनी मेहबूबा मुफ्ती हांणी मुख्यमंत्रिपदाचो राजिनामो दिले उपरांत सरकार पडलें. तेन्ना सावन जम्मू-काश्मीरांत केंद्रीय राजवट आशिल्ली.
२०२४ च्या विधानसभा वेंचणुकेंत नॅशनल कॉन्फरन्सान ४२ सुवातो जिखल्यात, तांच्या इश्टपक्ष कॉंग्रेसीन ६ आनी सीपीआयन (एम) एक सुवात जिखली. निकाला उपरांत फारुख अब्दुल्ला हांणी ओमर मुख्यमंत्री जातलो अशें सांगिल्लें. राष्ट्रपती राजवटीची अधिसुचवणी आयतारा रातीं उसरां जारी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
