ओमकार भजनी पथकाच्या भजनान सड्या वयले रसीक भारावले

भांगरभूंय | प्रतिनिधी

वास्को ः ‘देवाचिये द्वारी उभा क्षणभरी’, ‘कृष्ण माझी माता कृष्ण माझा पिता’, ‘अवघेची त्रेलोक्य आनंदले’, ‘ऐक सांगते यशोदे तुजला गेला वाया ग तुझा कान्हा’ अशा अभंगांनी, गळवणींनी आनी भैरवीन सड्या वयल्या रसिकांक भारावन सोडलें.
ओमकार भजनी पथकान अश्टमीचें पारंपारीक भजन जोशी कुटुंबाच्या हेडलॅण्ड सड्या वयल्या निवासस्थानार 18 आॅगस्टाक रातीं 10 ते 12 वरां मेरेन सादर केलें. भजनाची सुरवात ज्येश्ठ भजनी कलाकार गजानन नेरूलकार ऊर्फ भाई हांणी ‘जय जय राम कृष्ण हरी’ ह्या गजरान केली आनी उपरांत ‘देवाचिये द्वारी, उभा क्षणभरी’ हो अभंग सादर केलो.
पखवाजसाथी कलाकार एकनाथ गजानन मोरूडकार हांणीय एक अभंग सादर केलो. उपरांत एक ज्येश्ठ भजनी कलाकार मंगेश डिचोलकार हांणीय एक सुरेल अभंग विवीध रागधारींत सादर केलो. गजर स्पेशलिस्ट संतोष मोरूडकार हांणी आपले शैलींतलो गजर सादर केलो आनी ‘कृष्ण माझी माता कृष्ण माझा पिता’ हो अभंग सादर केलो. पथक मुखेल किशोर शेर्लेकार हांणीय एक पारंपारीक अभंग सादर केलो.
संतोष मोरूडकार हांणी आपले गुरू दिंडीसम्राट बाबू गडेकार हांची ‘ऐक सांगते यशोदे तुजला गेला वाया गं तुझा कान्हा’ ही गवळण सादर केली. संतोषाचो व्हडलो भाव एकनाथ गजानन मोरूडकार हांणी अवघेची त्रैलोक्य आनंदले ही भैरवी गावन कार्यावळीची सांगता केली. ह्या भजना खातीर संवादिनीचेर साथ प्रकाश तळवणकार हांणी दिली जाल्यार पखवाजसाथ अमोघ एकनाथ मोरूडकार आनी श्रेयस संतोष मोरूडकार हांणी दिली. भैरवी जातकच श्रीकृष्णाचे आरतीन आनी उपरांत तीर्थप्रसादान कार्यावळीची सांगता जाली.