भांगरभूंय | प्रतिनिधी
संजय बर्डे: लोकसभे आदीं अधिसुचोवणी जाहीर करपाची मागणी
भांगरभूंय । प्रतिनिधी
म्हापशें: एसटी समाजाक राजकी आरक्षण मेळोवन दिवचे खातीर जे तरेन सरकार यत्न करता. तेच तरेन लोकसंख्येंत भोवसंख्य आशिल्ल्या ओबीसी समाजाक लेगीत 2027 चे विधानसभा वेंचणुकेंत राजकी आरक्षण मेळचें. संबंदीत अधिसुचोवणी येता ते लोकसभा वेंचणुकेचे आचार संहिते आदीं सरकारान जाहीर करची, अशी मागणी संजय बर्डे आनी भंडारी समाज भावांनी केली.
बिरेस्तारा म्हापशेंच्या ओबीसीच्या बॅनरा खाला आयोजीत पत्रकार परिशदेंत बर्डे उलयताली.
एसटी समाजाच्या आरक्षणाचे मागणे खातीर मुख्यमंत्री आनी सरकाराचें शिश्टमंडळ दिल्ली गेल्ले. तेच धरतेर मुख्यमंत्र्यांनी ओबीसीक राजकी आरक्षण मेळोवन दिवचे खातीर भंडारी समाजाचें शिश्टमंडळ दिल्ली व्हरचें, अशीय मागणी बर्डे हांणी केली.
गोंयांत भोवजन समाजाचें प्रमाण चड आसतना ह्या समाजाक हक्काची माची दिवपाक सरकार टाळाटाळ करता. दरेका मतदारसंघांत राजकी जनगणना जावप गरजेची आसा. तशेंच भंडारी समाजांतल्या व्हड फुडाऱ्यांनी सरकाराक ओबीसीक हें हक्काचें राजकी आरक्षण मेळोवन दिवचे खातीर यत्न करचे. सत्ताधारी आनी विरोधी पक्षांतल्या भंडारी समाजांतल्या फुडाऱ्यांनी हे खातीर ‘एल्गार’ करचो. लोकसंख्ये प्रमाण गोंयांत ओबीसीक राजकी आरक्षण दिवचें. सध्या दक्षिणेंत भाजपा सरकाराक लोकसभे खातीर एसटी समाजाची गरज आशिल्ल्यानूच मतां खातीर हो डाव चल्ला, अशी टिका बर्डे हांणी केली.
दीपेश नायक हांणी सांगलें, 2027 चे विधानसभा वेंचणुकेंत ओबीसीक 12 मतदारसंघांनी राजकी आरक्षण दिवचें आनी हे विशींची अधिसुचोवणी काडची. तशेंच सरकारान ओबीसीची राजकी जनगणना करून समाजीक, शिक्षणीक आनी अर्थीक परिस्थिती तपासची, असो तांणी उलो मारलो. जनार्दन ताम्हणकार हांणी सांगलें, देशांत ओबीसीची टक्केवारी भोवसंख्य आसा. तरी लेगीत ओबीसीक कुशीक दवरतात, ही शोकांतिका आसा. गोंयांत भोंवजन समाजाचो शेक आसून लेगीत ओबीसीक राजकी आरक्षण मेळना, ही दुर्दैवी गजाल. 3 मार्चाक म्हापश्या कॅडर बेस प्रशिक्षण शिबीर जातलें. जांकां राजकारणांत येवपाचें आसा आनी ओबीसी समाजाची उदरगत करपाची आसा, तांकां ह्या शिबिरांत मार्गदर्शन करतले, अशें ताम्हणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
