भांगरभूंय | प्रतिनिधी
मुख्यमंत्री : क्लिनिकल अभ्यासक्रमांत फुडल्या सप्तका सावन आरक्षण
भांगरभूंय । प्रतिनिधी
पणजी : ओबीसी खातीर आरक्षणाची टक्केवरी वाडोवपाचेर तशेंच ओबसींक आरक्षणाचो कोटा वाडोवन दिवपा विशींचो निर्णय 2027 जनगणने उपरांत घेतले. तशेंच ओबीसी खातीर गोंय वैजकी महाविद्यालयांत क्लिनिकल सुवातांच्या आरक्षणा विशींचें परिपत्रक बेगिनूच उजवाडाक हाडटले, अशी म्हायती मुख्यमंत्री डॉ. प्रमोद सावंत हांणी दिली.
ओबीसीचो 27 टक्के आंकडो चुकीचो आसा आनी भंडारी समाजाचो कोटा वाडोवन दिवपाची मागणी आसा, अशें विजय सरदेसाय हांणी सांगलें.
गोंयांत भंडारी समाज म्हणटा तो 60 टक्के इतलो आनी खारवी समाजाचो व्हडलो वांटो हिंदू समाजा भितर आसा. ते भायर क्रिस्तांव ओबीसीच्या जातींचो हातूंत आस्पाव आसा. देखून 27 टक्के आरक्षण हें खंयच्या आदाराचेर थारयिल्लें. हो 27 टक्के आंकडो सारको ना. ते भायर ओबीसी भितरच कोटा वाडोवन दिवपाची भंडारी समाजाची मागणी आसा. सरकारा हातूंत केन्ना लक्ष घालतलें, असो प्रस्न फातोड्डेंचे आमदार विजय सरदेसाय हांणी केलो.
2012 चे जनगणने प्रमाण 2014 त पुराय ओबीसी जातींची आंकडो थारयिल्लो. हो आंकडो सारको ना. हे खातीर ताचें प्रमाणीकरण करपा खातीर 2027 त नव्या सर्व्हेक्षणाक सुरवात जातली. दोन वर्सा उपरांत पुराय आंकड्यांचो आस्पाव करून ओबीसीच्यो पोटजाती कितल्यो आसात, हें कळपाक सोंपें जातलें, अशें सरदेसाय हांणी सांगलें.
हाचेर जाप दितना मुख्यमंत्री डॉ. प्रमोद सावंत हांणी सांगलें, एकदां 2027 जनगणेनेचो डेटा येवंदी, तेन्ना आमी हे विशीं विचार करतले. आमकां सध्या अचूक आंकडो कितें तो खबर ना, हे विशीं सर्व्हे जातलो. सध्या हे विशीं जाप दिवप शक्य ना.
ते भायर खूबश्या सरकारी खात्यांनी ओबीसी खातीर राखीव केल्लीं पदां भरपाचीं उरल्यांत आनी तीं भरचीं. विविध सरकारी खात्यांतल्या रोस्टरांचेर 8 हजारां मदलीं 2141 राखीव पदां भरपाचीं आसात. सरकारी खातीं हो रोस्टर पळय नात, ताची नेमान पडटाळणी करिनात, असो आरोप सरदेसाय हांणी केलो.
समाज कल्याण खातें जेन्ना सांगता तेन्ना खातीं रोस्टराची पडटाळणी करतात. आतां खातें नवें परिपत्रक काडून सगल्या खात्यांक निर्देश दितलें, पदां रितीं आसूं वा नासूं तांणी वर्सांक एकदा रोस्टराची पडटाळणी करपाकूच जाय, अशें फळदेसाय हांणी सांगलें.
ते भायर कार्मीक खात्याक निर्देश दिवन गोंय कर्मचारी आयोगा वरवीं ओबीसी, एससी, एसटी जीं पदां भरपाचीं उरल्यांत तीं भरपाक सांगतले, अशें आस्वासन मुख्यमंत्र्यान दिलें.
गोंय वैजकी हॉस्पिटलांत क्लिनिकल फांट्याच्या अभ्यासक्रमांत अजून मेरेन ओबीसीं खातीर आरक्षण निश्चीत करूंक ना. हे खातीर सरकारान ओबीसींचेर व्हड अन्याय केला, असो आरोप विरोधी पक्ष फुडारी युरी आलेमांव हांणी केलो. हे विशीं जाप दितना मुख्यमंत्र्यान सांगलें, सुभाष शिरोडकार आनी तांचो पंगड हे विशीं पाठपुरवण करता आनी बेगिनूच हो विशय सुटावो जातलो. फुडल्या सप्तका मेरेन क्लिनिकल अभ्यासक्रमांत आरक्षण दिवपा विशींचें परिपत्रक बेगिनूच उजवाडाक हाडटले, अशें आस्वासन मुख्यमंत्र्यान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
