भांगरभूंय | प्रतिनिधी
भांगरभूंय । प्रतिनिधी
पणजीः गोंय दर्यादेग वेवस्थापन प्राधिकरणान बेतलां ओनजीसीक जेटी, प्रशिक्षण केंद्र आनी कन्व्हेंशन सेंटर सीआरझेड दाखल्या खातीर देड लाख इतले शुल्क भरपाक सांगला. तेल आनी सैमिक गॅसीच्या शोध आनी संशोधना खातीर सीआरझेड अधिसुचोवणी 2011 नुसार मेकळीक आसा अशें प्राधिकारणान सांगून ओनीजीसीक ना हरकत दाखलो दिल्लो.
तेल आनी सैमिक गॅस महामंडळ लिमिटेडचे (ओएनजीसी) मुखेल कार्यकारी संचालक हांणी मान्यता मेळिल्ले उफेवपी पोन्टून जेटीच्या रचनेत सुदारणा करपा खातीर तशेंच 5000 क्षमतेचे कन्व्हेंशन सेंटर, प्रदर्शन सभाघर आनी वेवेस्थापन प्रशिक्षण सुविधा खातीर अर्ज केल्लो. गोंयात अंतरराष्ट्रीय उर्जा सप्तक 2026 किटलां बेतूल वाठारांत ओएनजीसी हांगासर जावपाचो आसा देखून हे कार्यावळी खातीर ह्यो सुविधा गरजेचो अशें ओएनजीसीन सांगिल्लें.
उपरांत प्राधिकरणाचे अधिकाऱ्यांनी बेतूल ओनजीसीच्या सुवातेर वचून पळोवणी करून आपलो अहवाल सादर केलो. हे अहवालाचेर विचार विनिमय करताना प्राधिकरणान सीआरझेड अधिसुचोवणी 2011च्या परिच्छेद (3) (एक्स) (बी) तेल आनी सैमिक गॅसाचे सोद आनी संशोधन करपा खातीर ओनजीसीक ना हरकत दाखलो दिल्लो.
पूण हे ना हरकत दाखलो दिवपाचे वेळार दिसून आयले की हो प्रस्ताव मंजुर करपाक अधिसुचीक शुल्क आकार नासलो. हाचेर प्राधिकरणाचे बसकेत विचार विनिमय करून हो दाखलो घेवपा खातीर रु. 1.50 लाख इतले शुल्क भरपाचे निश्चित जाले.
प्रस्तावीत इमारतीची लिफ्ट आनी इस्काती मेरेन वचपी 40.28 मीटर लांब आनी 2.51 मीटर उंच गँगवे रस्त्या खातीर रु. 25 हजार. तशेंच 20.34 मीट उंच 2 लिफ्ट आनी 27.47 मीटर लांब आनी 2.20 मीटर रुंद 2 इस्काती खातीर रु. 1,25,00 इतले शुल्काचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
