भांगरभूंय | प्रतिनिधी
उच्च न्यायालायच्या आदेशांक येवकार दीत खासदार कॅप्टन विरीयातोची टिका
पणजीः कळंगूटे, कांदोळे, नागव्यां, हडफडें आनी पर्रा ओडीपी रद्द करपाच्या उच्च न्यायालयाच्या निर्णयांक गोंय प्रदेश कॉंग्रेशीन येवकार दीत कळंगूटेचे आमदार मायकल लोबो हांचेर टिका केली. हे पांचय ओडीपी तयार करून मायकलान वट्ट ३८.६९ लाख चौ. मी. सुवातीचे झोन बदल केले. आतां हे ओडीपी रद्द जाल्ल्यान मायकल हांकां लोकां कडल्यान घेतिल्ले पयशे बुडले देखून तो देश सोडपाची तयारी करपाक शकता, असो गंभीर आरोप खासदार विरीयातो फर्नांडीस हांणी केला.
उच्च न्यायालायन ओडीपी रद्द करपाच्या निर्णयाक येवकार दिवन हे विशीं अदीक म्हायती दिवपा खातीर कॉंग्रेसीन पत्रकार परिशद घडोवन हाडली. ह्या वेळार गोंय कॉंग्रेस प्रदेशाध्यक्ष अमित पाटकार, खासदार विरीयातो फर्नांडीस, कॉंग्रेसीचे द. गों. अध्यक्ष सावियो डिसिल्वा, उत्तर गोंय कॉंग्रेस अध्यक्ष वीरेंद्र शिरोडकार हजर आशिल्ले.
ह्या वेळार उलयतना कॅ. फर्नांडीस हांणी सांगलें, २०१२ त आमदार मायकल लोबो हांच्या फुडारपणा खाला उत्तर गोंय नियोजन आनी उदरगत प्राधिकरणा वरवीं ओडीपी तयार करून वाट लावपाक सुरवात जाली आनी २०२२ उपरांत फ्रान्सिस सिल्वेरा हांच्या फुडारपणा खाला ताका ओतो आयलो.
हे विशीं खूब आंदोलनां जालीं. मात सरकारान आमचें आयकूंक ना. उपरांत कांदोळी सिटीझन फोरम, कळंगूटे सिटीझन फोरम आनी गोवा फांवडेशन हांणी न्यायालयांत याचिका दाखल केली आनी न्यायालयान व्हडली थाकाय दिल्या. न्यायालयाच्या आदेशांत स्पश्ट म्हणलां, मायकल लोबो हांणी सुवातांचें रुपांतर केलां आनी अधिकार्यांक हुकूम दित सर्व्हे नंबर, सुवातेचे झोन बदल्ल्यात, असो दावो विरीयातो हांणी केलो.
प्रादेशीक आराखड्याचो मुसदो म्हण ओडीपी चालीक लायलो आनी तडजोड केले उपरांत ८ लाख चौ. मी. सुवात रुपांतरीत करपाचे थारयलें. मात उपरांत वट्ट १६ लाख चौ. मी. सुवात सेटलमेंटात रुपांतर केली. मायकल लोबो हांणी आपली स्वताचे २७,८१४ चौ. मी. सुवातेचो झोन बदल्ला, असो आरोप विरीयातो हांणी केलो.
प्रादेशीक आराखडो २०२१ वर्सा मायकलान ९३,८०० चौ. मी. कुळ शेतजमनीचें रुपांतर सेंटलमेंटांत केलें आनी ओडीपींत ८,७५१ चौ. मी. कुळ शेतजमनीचें रुपांतर सेंटलमेंटांत केलें. ते भायर ९६,५८२ चौ. मी. शेतजमनीचें रुपांतर सेटलमेंटांत केलें. ९५,६१० चौ. मी. एनडीझेड वाठार सेटलमेंट केलो. जी कांदळी आमकां सुनामी आनी हुवारां पासून वाटयता त्या ८ चौ. मी. कांदळी वाठाराचो झोन बदलून पर्यावरणाची वाट लायली, असोय आरोप विरीयातो हांणी केलो.
उपरांत मायकल कॉंग्रेसी भितर येवन विरोधी पक्ष फुडारी जालो. मात भाजपाक ते पसंत पडूंक नाशिल्ल्या कारणान उच्च पांवडेवेली समिती स्थापन केली आनी २२ एप्रिलाक ओडीपी स्थगीत दवरली. उपरांत १४ संप्टेंबराक मायकलाची घरवापसी जाली आनी स्थगीत दवरिल्ली ओडीपी आसली तशी परत चालीक लायली, असो दावो विरीयातो हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
