ओडिशा एफसीचो दोळो प्ले ऑफाचेर

भांगरभूंय | प्रतिनिधी

इंडियन सुपर लिगेच्या (आयएसएल) प्ले ऑफांतली सुवात निश्चीत करपा खातीर ओडिशा एफसीक फकत एका गुणाची गरज आसा. आयज घरच्या मैदानाचेर जमशेदपूर एफसी आड जावपी मॅचींत गरजेचो गूण घेवन फुडले फेरयेंत सुवात मेळोवपाचो ताचो यत्न आसतलो.

ओडिशा एफसीक अजून मेरेन प्ले ऑफांत सुवात मेळूंक ना. सध्या 30 गुणां सयत तो सवे सुवातेर आसा. जाल्यार एफसी गोवा तीन गुणांनी फाटीं आसा. ओडिशा आयज हारलो जाल्यार एफसी गोवाक संद मेळुये आनी त्या वेळार गोल सरासरी निर्णायक थारतली.

ओडिशा एफसीन आयएसएलाच्या पयल्या अर्धांत सातत्यान बरो खेळ केलो. पूण, दुसऱ्या अर्दांत ताच्या प्रदर्शनांत सासत्य उरूंक नाशिल्लें. पयल्या धांतल्यो स मॅची जिखल्यो. तीन मॅचींनी हार घेतली. दुसऱ्या अर्दांत णवांतल्यो फकत तीन मॅची जिखल्यो. चार मॅची वगडायल्यो. त्या तिनांतलीं दोन जैतां फाटल्या तीन मॅचींतल्यान आयल्यात.

शुक्रारा ओडिशा एफसीन नॉर्थ इस्ट युनायटेडाक 3-1 असो हारोवन सेगीत दुसऱ्या जैताची नोंद केली आनी पयल्या तीन सप्तकां उपरांत पयलेच खेपे सेगीत दोन मॅची जिखल्यो.

नंदाकुमार सेकरान पांच मॅचींतल्यान स गोल केल्यात आनी दिएगो मॉरिसिओ हो 12 गोलां सयत अंदूंच्या हंगामांत सगल्यांत चड गोल करपी क्लेयटन सिल्वा सयत जोड रितीन पयले सुवातेर आसा.

आयचे मॅचींत बरो निकाल लागल्यार आमी प्ले ऑफा खातीर पात्र थारुये. सांखळी फेरयेंतली ही घरच्या मैदाना वयली निमाणी मॅच आसा, ताका लागून जिखपाची आमची मोख आसा. ते उपरांत आमी दुसऱ्या निकालाचो विचार करतले. जमशेदपूर एफसी हो बळिश्ट पंगडांतलो एक आसा. फाटल्या हंगामांत ताणें लीग शिल्ड जिखिल्ली. तो लेगीत जैत मेळोवपाकूच खेळटलो. पूण, आमी प्ले ऑफांत सुवात मेळोवपाक इत्सूक आसा अशें मुख्य प्रशिक्षक जोसेफ गोम्बाऊन म्हणलें.

जमशेदपूर एफसी फाटल्या तीन मॅची सावन अपराजीत आसा. ताणें दोन मॅची जिखल्यात जाल्यार एक मॅच बादाबाद दवरल्या. हातूंतल्या दोन मॅचींनी ताणें प्रतिस्पर्धी पंगडांक गोल करपाक दिवंक ना. पूण, स्वता पांच गोल केल्यात.

फाटल्या सप्तकांत ताणें हैदराबाद एफसी आड 3-2 अशें उमळशीक वाडोवपी जैत जोडिल्लें. डॅनिएल चुकू आनी ऋत्विक दास हांणी गोल केल्यात. दोगांयनी अंदूंच्या हंगामांत दरेकी पांच गोल केल्यात. मजगतीं, हैदराबाद एफसी आड रॅड कार्ड मेळिल्ल्यान एली साबियाक आयचे मॅचींत खेळपाक मेळचें ना.