भांगरभूंय | प्रतिनिधी
खबरां संस्था
भुवनेश्वरः हिरो इंडियन सुपर लीग 2022-23तली (आयएसएल) प्ले ऑफची सर्त चुरशीची जातली अशें दिसता. तातूंत दरेक मॅच जिखपा खातीर आतां चडाओड लागिल्ली दिश्टी पडटली. नव्या वर्साच्या पयलेच मॅचींत ओडिशा एफसी घरच्या मैदानार मुंबय सिटी एफसी कडेन खेळटलो. अंदूचे हे सर्तीच्या पयल्या मॅचींत मुंबय सिटीन जैत मेळोवन जैत मेळोवन तीन गुणांची जोड केल्या. मुंबय सिटी अंदूच्या सर्तींत हार खावची पडूंक ना असो पंगड आसा. मात कलिंगा स्टेडियमाचेर तांची कसवटी लागतली. कारण एक फावट तांची मॅच ड्रॉ जाल्ली.
ओडिशाक फाटल्या तीन मॅचींत तीन गुण मेळोवपाक जमलें ना. आनी तिनूय मॅचींत तांका गोल करपाकूय जमलें ना. फाटले मॅचींत केरळ ब्लास्टर्सान निमाण्या चार मिनटांत गोल करून तांका हारयल्लें. तिनांतल्या दोन मॅचींत एक तरी खेळगड्याक निलंबनाक लागून भायर बशिल्लो. सोमाराक साऊल क्रेस्पो व्हो मुंबय एफसी आड सुरवातीचे फळयेंत परत येवपाक तयार जाला. ताचेर लेगीत निलंबनाची कारवाय जाल्ली.
मुख्य प्रशिक्षक जोसेफ गोम्बाऊ मुंबय सिटी आड बळीश्ट पंगड मैदानार देंवयतलो. आमी तेच रणनीतीन मैदानार येतले आनी बॉलाचेर ताबो दवरून हाय प्रेसिंग मॅच खेळटले. प्रतिस्पर्धी पंगडा कसो खेळटलो हाची वाट पळयत बसपी आमचो पंगड न्हय. आमचो पंगड मानसीक नदरेन कणखर आसा आनी आमकां जिखपाची हीच संद आसा अशें ताणे सांगलें.
मुबय सिटी नव्या वर्सा आपल्या जैताची माळ कायम राखपाज सज्ज आसा. सोमारा तांणी जैत मेळयल्यान गुणक्रमवारींत ते पयले सुवातेर पावतले. मुंबय सिटीन 11तल्या 8 मॅचींत जैत मेळोवन 32 गोल केल्यात. पोरूचो वस्ताद हैदराबाद एफसी परस 8 चड गोल मुंबय सिटीन केल्यात. ग्रेग स्टीव्हर्ट हा हिरो आयएसएलांत सगल्यांत चड गोल सहाय्य करपी खेळगड्यांचे वळेरेंत संयुक्त दुसरे सुवातेर आसा. ग्रेगान 11 मॅचींत 7 गोल करपाक मजत केल्या आनी ताणे स्वता 4 गोल केल्यात. बिपीन सिंग आनी लालीन झूआला छांगटे हांका आडावप प्रतिस्पर्धी खेळगड्यांक कुस्तार जाता.
खेळगड्यांक उर्बां दिवपा खातीर म्हाका चड कांयच करचें पडना. कारणे ते सगळे मेहनती आसात. ताचें कामगिरीचेर हांव खोशी आसा. आतां आमकां बरें कितें तरी करपा खातीर यत्न करचे पडटले अशें मुखेल कोच बँगिंगहॅम हांणी सांगलें.
ओडिशा आमी मुंबय सिटी एफसी मदीं 7 मॅची जाल्यात आनी निकाल मुंबय सिटी वतीन लागल्यात. मुंबय सिटीन 4 मॅचींनी जैत मेळयलां. ओडिशाक 3 जैत मेळयल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
