ओडिशाच्या तन्वीक दोट्टी किताब

भांगरभूंय | प्रतिनिधी

धी योनेक्स-सनरायझ 2024 अखील भारतीय उप कनिश्ठ मानांकीत बॅडमिंटन सर्तींत ओडिशाची तन्वी पत्री हिणें दोट्टी किताब जिखलो. गोंय बॅडमिंटन संघटणे वतीन अखील भारतीय बॅडमिंटन संघटणेच्या सहकार्यान सर्त म्हापशें पेडेंच्या बहुउद्देशीय खेळां संकुलांत आयोजीत केल्ली.

तन्वी पत्रीन 15 वर्सां पिराये सकयले आनी 17 वर्सां पिराये सकयले चलयांच्या एकोड्या गटांत वस्तादपण जोडलें. 15 वर्सां पिराये सकयल्या गटांतले फायनलींत तिणें पयल्या सिडा वयली कर्नाटकाची हितश्री एल राजैया हिका 21-9 आनी 21-10 अशा सरळ गेमींनी हारयलें. तन्वीन आपलो हो फॉर्म 17 वर्सां पिराये सकयल्या गटाचे फायनलींत लेगीत कायम राखलो. ह्या गटांत तिणें नवी दिल्लीचें ऋषिका नंदी हाका 21-14, 19-21 आनी 21-15 अशा फरकांनी हारोवन सर्तींतलो आपलो दुसरो किताब जिखलो.

चल्यांच्या 15 वर्सां पिराये सकयल्या गटांत तेलंगणाच्या शशांक वनमालान तमिळनाडूच्या नीरज नायर पी एसा आड 21-16, 21-15 जैत जोडून वस्तादपण जोडलें. 17 वर्सां पिराये सकयल्या चल्यांच्या गटांतलें वस्तादपण कर्नाटकाच्या ज्ञाना दत्तू टी टी हाका फावो जालें. उत्तराखंडाच्या सुर्याक्ष रावताक ताणें 21-13, 21-14 अशा सरळ गेमींनी हारयलो.

15 वर्सां पिराये सकयले चलयांच्या दोट्टी गटांत आराध्या रेड्डी हनुमाहा गरी आनी अवनी रेड्डी हनुमाह गरी हे महाराष्ट्राचे जोडयेन विजया तेजस्विनी धंतुलुरी आनी श्रेया त्रिपाठी हे आंध्रप्रदेश-दिल्लीचे जोडयेक 21-8, 21-15 अशी हारयली.

हेर निकाल अशेः (अण्डर 15 चल्यां दोट्टी गट) शाश्वत चौधरी-शौर्य चौधरी (दिल्ली) जैत आड तनिष चोकसी आनी भाशी पाठक (गुजरात) 16-21, 21-10, 21-14. (अण्डर 17 चल्यां दोट्टी गट) निश्चल चंद आनी सुर्यांश रावत (उत्तराखंड) जैत आड बिजॉर्न जेसन आनी आतिष श्रीनिवास (केरळ) 17-21, 22-20, 21-19. (अण्डर 15 मिश्र दोट्टी गट) केव्हेयुगन के एक आनी अनुष्का जेनिफस ए एस (तामिळनाडू) जैत आड वेदांत पाहवा आनी गौरी कल्ला (हरयाणा) 21-17, 21-17. (अण्डर 17 मिश्र गट) बोर्निल आकाश चंगमाई आनी शांतीप्रिया हजारिका (आसाम) जैत आड मनिष एस रेड्डी आनी दीपक राज आदिती (कर्नाटक) 21-17, 21-13, (अण्डर 17 चलयां दोट्टी गट) अनया बिश्ष आनी अॅंजेल पुनेरा (उत्तराखंड) जैत आड दिया बिमाह बी (कर्नाटक) आनी बरुनी पर्शवल (हरयाणा) 21-10, 21-14.

इनामां भेटवण सुवाळ्याक शेखर बिस्वास (अध्यक्ष-सर्त समिती, बीएआय), ओमर राशीद (समन्वयक-सर्त समिती, बीएआय), प्रभाकर राव (निरिक्षक-सर्त समिती, बीएआय), मनोज पाटील (अध्यक्ष, गोंय बॅडमिंटन संघटणा), प्रवीण शेनॉय (सचीव, गोंय बॅडमिंटन संघटणा), संजय भोबे (भांडारी, गोंय बॅडमिंटन संघटणा), संदीप हेबळे (आयोजन सचीव) आनी विनायक कामत (तंत्रीक सल्लागार).