भांगरभूंय | प्रतिनिधी
भुवनेश्वर, खबरां संस्था ः ओडिशाच्या जाजपूर जिल्ह्यांतल्या न्यायालयान तीन वर्सां पयलींच्या प्रकरणांत 17 आरोपींक जल्मभराचे बंदखणीची ख्यास्त दिल्या. तशेंच न्यायालयान दरेका आरोपीक 10 हजार रुपया दंड घाला. 2020 वर्सा जादूटोण्याच्या दुबावान एका जोडप्यांक जिवें लासून मारिल्ल्याचो गुन्यांव नोंद जाल्लो. हातूंत 17 आरोपींक अटक केल्ली.
प्रकरण कितें?
7 जुलय 2020 दिसा रातीं उसरां ओडिशाच्या कलिंगनगरांतल्या निमापाली गांवांतल्या जोडप्याच्या घरांत जायते लोक घुसले. ह्या जोडप्याचें नांव शैला बालमुज आनी सांब्री बालमुज अशें आसा. गांवच्या लोकांनी त्या जोडप्याचेर जादूटोणो करपाचो आरोप करून हल्लो केलो. कांय काळा उपरांत लोकांनी जोडप्याच्या घराक उजो लायलो आनी ते जोडपे तांतूत लासले.
जाजपूर रोड न्यायालयाचे अतिरिक्त जिल्लो आनी सत्र न्यायाधीश हृषिकेश आचार्य हांचे मुखार ही सुनावणी जाली. न्यायाधीशान सुनावणी वेळार 20 साक्षीदारांचें म्हणणें आयकून जायते पुरावे पळयले अशें सरकारी वकील रजत कुमार राऊत हांणी सांगलें. हे गवाय आनी पुराव्याचेर न्यायाधीशान आरोपींक जल्मभराचे बंदखणीची ख्यास्त फर्मायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
