भांगरभूंय | प्रतिनिधी
महेश नारायणनः ‘अरियप्पू’ सशक्त चित्रपट आशिल्ल्याचो दावो
भांगरभूंय । प्रतिनिधी
पणजीः ऑनलायन स्ट्रिमींग माची (ओटीटी) आनी परंपरीक पद्दतीचीं चित्रपट घरां एकामेकाच्या हातांत हात घालून चलतलीं, असो विस्वास दिग्दर्शक महेश नारायणन हांणी उक्तायलो.
इफ्फींत इंडियन पॅनोरमा विभागांत नारायणन हांणी दिग्दर्शीत केल्लो ‘अरियीप्पू’ हो चित्रपट दाखयतले. ते निमतान ते उलयताले.
आदल्या तेंपाचेर स्वतंत्र चित्रपट निर्मात्यांक तांचे चित्रपट प्रसारीत करचे खातीर दूरदर्शना बगर दुसरो पर्याय नाशिल्लो. पूण आतां अशा चित्रपट निर्मात्यांक फाटबळ थारूं येतले, अश्यो ओटीटी माचयो उपलब्ध जाल्यात. ताका लागून अशा कांय माचयांचो आदार घेवन खंयच्या ना खंयच्या मार्गान निर्माते आपलें अस्तित्व तिगोवन दरपाक शकतात, अशें नारायणन हांणी सांगलें.
अशें आसलें तरीय अश्यो सगळ्योच माचयो दरेक चित्रपट आपणायता अशें ना. ते खातीर अभिनेते कलाकार कोण आसात, चित्रपटाची व्यवहार्यता तपासचे खातीर, चित्रपटांतली गुंतवणूक आनी ते खातीर मेळिल्लो अर्थीक आदार फावोसो आसा काय ना, अशे साबार निकश लायतात. ताचेर चित्रपट आपणवचो काय ना तें निंबून आसता, अशें नारायणन हांणी सांगलें.
कोरोना म्हामारीक लागून कारखान्यांनी काम करपी कुशळ कामगारांचेर कसली परिस्थिती आयली, तशेंच सेगीत गंभीर अडचणी निर्माण करपी समस्यांक लागून परिस्थिती कशी बदल्ली, हो विशय ‘अरियप्पू’ चित्रपटांत मांडला. ह्या चित्रपटांत समकालीन समाजीक विशयांक स्पर्श केला. बायल आनी दादल्या मदल्या घुस्पागोंदळाच्या नातें संबंदांचेर आदारीत असो सशक्त चित्रपट आशिल्ल्याचें नारायणन हांणी सांगलें. चित्रपटाचे निर्माते शबीन बेकर, अभिनेत्री दिव्याप्रभा पी. जी. आनी फोटोग्राफी करपी सानू जॉन वर्गीस हे लेगीत ह्या वेळार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
