भांगरभूंय | प्रतिनिधी
मुंबय, खबरां संस्था : नामनेचे सिने दिग्दर्शक मणिरत्नमाची घरकान्न सुहासिनीन भारतीय ओटीटी प्लॅटफॉर्मांचेर तशेंच बॉलिवूड स्टारांच्या ‘बोल्ड कंटेंटा’चेर टिप्पणी केल्या. ओटीटी प्लॅटफॉर्मांचेर कलाकारांनी बोल्ड दृश्यां दिवप बंद करचें अशें सुहासिनीचें मत. इतलेंच न्हय तर बॉलिवूडांतली आदली अभिनेत्री पूनम ढिल्लों हांणी सुहासिनीच्या ह्या निवेदनाक तेंको दिला.
सुहासिनीन एका खबरां चॅनलाचे कार्यावळींत आपलें मत मांडलां. तिणें आपूण आनी पूनम ढिल्लों मदीं जाल्ल्या संवादाचोय संदर्भ दिला. ओटीटीचेर बरे – बरे कलाकार खूबच बोल्ड सीन करतात तें पळोवन सुहासिनी अस्वस्थ जाली आनी तिणें पूनम हांचे कडेन चर्चा केल्ली.
पूनम हांचे कडेन जाल्लें तें संवाद याद करून सुहासिनीन सांगलें, ‘हांवें ओटीटीचेर तो बोल्ड कंटेंट पळयलो. मागीर एक गजाल म्हाका दिसली, ती म्हणल्यार ह्या लोकांक खंयच्यान इतलें धाडस जाता. जें एक समाज, सॅन्साॅर बोर्ड वा कायदो पसून केन्नाच मान्य करचो ना, तसलीं दृश्यां हे नामनेचे कलाकार बेधडक करतात. देखून हांवें पूनमाक फोन करून विचारलें की हांव मुंबय येवन ह्या कलाकारां कडेन संवाद सादपाक शकतां? अशे बोल्ड सीन करचे न्हय अशी विनवणी करपाक शकतां? कारण ते अशें करून हेरांक चुकीची वाट दाखयतात. ताचेर पूनमान म्हाका सांगलें, सध्या शांत राव, चेन्नयच राव, हांगा येवं नाका.’
हे मुलाखतींत सुहासिनीन नांव घेनासतना एका व्हडल्या ओटीटी प्लॅटफॉर्माचेर टिका केली. हाचेर खास करून कोविड काळांत खूब सॉफ्ट पोर्न कंटेंट आनी बोल्ड कंटेंट आयलो असो उल्लेख सुहासिनीन केला. ही एक सामकी गंभीर समस्या अशेंय तिणें हे कार्यावळींत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
