ओगीच पर्यटन वाडचें ना…

भांगरभूंय | प्रतिनिधी

गोंयचो पर्यटन वेवसाय सोंपत चल्ला असो आवाज विरोधी पक्षांतले फुडारी करीत आसात. कांय वेळा तर पर्यटन वेवसायांतले भागीदार लेगीत होच सूर लायतात. मात, गोंय सरकार तें मानपाक तयार ना आनी पर्यटनाचेर कसलोच फरक पडिल्लो ना अशें खात्रीन सांगतात.
गोंयचे पर्यटन मंत्री रोहन खंवटे हांणी पोरूं ऑगस्टांत केंद्रीय पर्यटन मंत्री गजेंद्र सिंग शेखावत हांची भेट घेवन अंतरराष्ट्रीय पांवड्यार पर्यटक गोंयांत येवचे म्हूण सहकार्य मागलें. तें मेळ्ळां जाल्यार अंदूं गोंयच्या पयर्टनांत अंतरराष्ट्रीय पर्यटकांची भर पडटली. पडूंक जाय. कारण गोंयचो खण वेवसाय बंद पडत सावन पर्यटन वेवसाय गोंयचो अर्थीक कणो जाला. तोय मोडलो जाल्यार राज्याचेर आशिल्लें रिणाचें वजें आनीकय वाडटलें.
गोंयच्या ल्हान, मध्यम हॉटेल धनयां कडेन उलयले जाल्यार तांचो वेवसाय ऑनलायन कंपन्यांनी खाला अशें ते सांगतात. अश्यो कांय कंपनी आसात ज्यो पर्यटकांक व्हिला आनी हेर रावपाच्यो सुवाती दितात. तांचे खातीर ल्हान आनी मध्यम हॉटेलांचो वेवसाय गेला अशें कांय जाणांचें म्हणणें आसा. हें खरें आसा जाल्यार गोंयकार धनयांचो हो वेवसाय सांबाळून दवरपा खातीर सरकारान पावलां मारपाचीं गरज आसा. कित्याक तर ह्यो ऑनलायन कंपनी येवचे आदीं ह्याच गोंयकारांनी गोंयचे पर्यटन आपल्या सरबरायेन तिगोवन दवरलां. हे खातीर तांचे कडेन पडमूर जावन उपकारचें ना.
गोंयांत अशे खूबशे वेवसाय आसात, जे आयज बिगर गोंयकार चलयतात. विदेशांतले लोक लेगीत आमचे पारंपारीक वेवसाय चलयतात. ताका कारणीभूत आमीय आसात, कित्याक तर आमी सुसेगाद बसपा खातीर तांकां हे वेवसाय दिल्यात आनी आतां ते आमचे कडेन परत येवंक कुस्तार जाल्यात.
कांय जाण हांगां अशे ‘सॅट’ जाल्यात की तांच्या हातांत प्रस्न करतल्यांक बडोवपाक दांडे दिसतात आनी तांचेर जाय तशी कारवाय लेगीत जायना. हें अशेंच चालू उरलें जाल्यार आमचें अस्तित्व ना जातलें. गोंयकारपण शेणटलें आनी आमची फुडली पिळगी दादागिरीच्या भयांत सांपडटली. हें अशें जावचें न्हय म्हूण दरेकल्यान जबाबदारीन वागपाची गरज आसा.
गोंयच्या दर्यादेग वांठारांत आनी पर्यटन सुवातांचेर जे ‘टाव्टस्‌’ (दलाल) दिसतात ते बिगर गोंयकार. ते आमचो वेवसाय शेजारच्या राज्यांनी व्हरतात असो आरोपूय आदीं जाला. हो आरोप सारको आसा जाल्यार तांचेर त्याच खिणाक कारवाय जावंक जाय आशिल्ली. आनीक जाल्या जाल्यार हे दलाल परत त्या त्या सुवातांचेर दिसचे नात हाची काळजी सरकारान घेवंक जाय. घेतली ना जाल्यार आमच्या पर्यटना मुखार एक एक नवें आव्हान तयार जातलें हातूंत दुबाव ना.
हें सगळें करतना कळंगुट वांठारांतल्या लोकांनी दोन वर्सां आदीं गांवांत आंदोलन केल्लें हेंवूंय विसरूंक फावना. ह्या दलालांक लागून गांवच्या महिलावर्गाक सांजच्या वेळार घरांतल्यान भायर सरूंक लेगीत भंय दिसता अशें त्या वेळार लोकांनी सांगिल्लें. थंयचे लोक गोंयच्या पुलीस महानिरिक्षकाक लेगीत मेळून गेल्ले. ते उपरांत हांगच्या ह्या दलालांक धांवडायले? काय ते अजून थंय आसात? तांकां धांवडावंक नात जाल्यार ताचीं कारणां कितें? हाची चवकशी जावंक जाय. गोंयकारांक भियोवन उडोवपी प्रकार आमच्या गोंयांत नाकात.
आतां ल्हवू ल्हवू करून पर्यटनाच्या गतीक सुरुवात जातली. नातलां आनी नव्या वर्साच्या येवकाराक लाखांनी पर्यटक गोंयांत येतले, तांची सुरक्षा आनी तांकां कोणें फटोवचे न्हय म्हूण सरकारान पावलां मारपाची गरज आसा. अशा कारणांक लागून सोशल मिडियाचेर गोंयची बदनामी जावची ना हाची तर चडूच दखल घेवपाची गरज आसा. चॅकनाक्यांचेर पुलीस पयशे घेतात अशे व्हिडीयो कांय दिसां आदीं वायरल जाल्ले. ताची सत्यताय सोदून कारवाय करपाची गरज आसा.
गोंयचें पर्यटन बरें चलतलें जाल्यार सरबराये बरोबर तांकां सुरक्षा आनी बरें वातावरण दिवपाची गरज आसा. ओगीच पर्यटन वाडचें ना….

समीर नायक
मडगांव