भांगरभूंय | प्रतिनिधी
आमच्या भाटा सकयल एक व्हाळ व्हांवता. व्हाळाचे कुशीकच चारूय वटांनी गरगरीत वाडिल्लें अोंवळाचें
झाड आसा. दिसवड्याक कामाक येवपी कामेरीं दनपारचीं नाजाल्यार सांजवेळचीं मोडतकूच (कामा वेल्यान सुटप ) अोंवळीणीच्या झाडां पोंदा धांव घेतात. लागींच एक सायल्याचें झाड आसा. अोंवळां वेंचून ह्या सायल्याच्या पानांत गुठलायतात. दुसरे दीस तांचो व्हळेसर गुथून आमगेर हाडून दितात आनी उरिल्ले व्हळेसर तांच्या माथ्यार सोबून दिसतात. गांवगिऱ्या वाठारांनी भाटां बेसांच्या सरभोंवतणी अोंवळींचीं झाडां दिश्टी पडटात. अोंवळीणीचें झाड एकदां फुलांनी भरलें, काय सरभोंवतण तांच्या सुवासान न्हावन वता.
पूण गांवगिर्या वाठारांनी अशेय मानतात की सांजवेळार, रातीच्या वेळार जिवाणीं, सोरोप अोंवळांच्या घमघमीत परमळाक लागून अोंवळीणीच्या झाडां पोंदां आपलो राबितो करतात. एक दोग जाणांक सोरपान दंश केल्ल्याच्यो घडणुको तिखटमीठ लायिल्ल्यो आयकूंक मेळटात. बायलांक आनी लहान भुरग्यांक ओंवळांची फुलां म्हणल्यार जीव की प्राण. ओंवळा एकदां फुलपाक लागलीं काय फुलां हाडून व्हळेसर करून माळीसर गांवांतल्या बायलमनशांचो जीव धादोशी जायना.
सादारण डिसेंबरच्या मानान ओंवळीन फुलपाक लागता. फुडले दोन म्हयने ताचो भार आसता. फुलिल्लीं अोंवळां जमनीर पडटात. तीं वेंचून हाडून तांचे व्हळेसर गुथपाचे. फुलां गुथतना सूय-दोऱ्याची गरज पडना. अोंवळीच्या फुलांक मदीं मेकळो जागो आसता. माडाच्या चुडटांचो नाजाल्यार केळीच्या दोरान हीं फुलां सहज गुथपाक मेळटात. सांजवेळा नाजाल्यार तिन्हसांजचो वेळ हो अोंवळां पुंजावपाचो योग्य वेळ.
ओंवळां एकठांय करून पोशांत घेवन तांचो वास घेना, तो मेरेन अोंवळां वेंचिल्ल्याचें समाधान आमकां मेळना. उण्यांत उणें तीन ते चार दीस अोंवळांचो वास घमघमता. ओंवळां वेंचतना वाऱ्याच्या झोता वांगडा ल्हान नखेत्रां सारकीं दिसपी ओंवळां जेन्ना गोल गोल घुंवत जमनीर पडटात, तो खीण पळोवप म्हणल्यार भांगराळ्यो यादी एकठांय केल्ल्या सारख्यो.
आतांच्या दिसांनी हीं अोंवळीचीं झाडां उणीं जायत आसात. नर्सरींक विकपाक आसतात त्या कलमांचे झाड चड व्हड जायना. आनी मुखेल म्हळ्यार, तांकां घमघमीत परमळ नासता. ओंवळांचे व्हळेसर गुथून जाले काय पयलो व्हळेसर देवाक अोंपतात. फोंडें म्हालांत नागेशी, रामनाथी, कवळ्यां, मंगेशी देवळां भायर थळावी फुलां विकपी बायलां अोंवळांचे पड विकपाक बशिल्लीं नदरेक पडटात.
आदल्या तेंपार शाळेंत वचपी भुरगीं थोडीं ओंवळा पुस्तकांत दवरतालीं आनी थोडीं फुलां घडी केल्ल्या लेंसांत दवरतालीं. सप्तकभर तरी तांचो वास लेंसांत परमळत रावतालो…. आतां मेळटा त्या परफ्युमचो वास लेगीत ह्या फुलांच्या वासा मुखार किकोंत थारतलो.
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
