भांगरभूंय | प्रतिनिधी
पणजीः ओंठाक कातरो पडिल्लीं बाळकां आनी भुरग्यां खातीर जीएसआर इन्स्टिट्यूट हैदाराबाद आनी स्मायल हावस इटली मुफत शस्त्रक्रिया घडोवन हाडटले. 1 ते 4 ऑक्टोबर मेरेन मुरगांव बदरांचेर इटलीचे विमानवाहू बोटीचेर ही शस्त्रक्रिया जातली. हे संदीचो गरजवंतांनी लाव घेवचो, असो उलो जीएसआर हॉस्पिटलाच्या दोतोरांनी मारला.
हे विशीं म्हायती दिवपा खातीर जीएसआर हॉस्पिटलान गोंय रॅड क्रॉस सोसायटी सभाघरांत पत्रकार परिशद घेतिल्ली. ह्या वेळार डॉ. अपुर्वा, डॉ. नैनिका कृष्णन, डॉ. ए. आर. थेन्नारासू आनी रॅड क्रॉस सोसायटीचे जॉन आगियार हाजीर आशिल्ले.
जीएसआर चॅरिटेबल हॉस्पिटल आनी स्मायल हावस इटली हे गोंय राज्यांतल्या तशेंच सरभोवतणच्या जिल्ह्यांतल्या लोकां खातीर कातरो पडिल्ले ओंठ आनी तोंड तशेंच हेर चेऱ्याचेर आशिल्ल्या नोतांचेर शस्त्रक्रिया करतले. 1 ते 4 ऑक्टोबर मेरेन गरजू लोकांक हाचो लाव घेवपाक मेळटलो, अशें डॉ. अपुर्वा हांणी सांगलें.
1 ते 2 ऑक्टोबर मेरेन बाळका वा भुरगीं जांकां हो त्रास आसा तांचें निरिक्षण गोंय दांत म्हाविद्यालय आनी मडगांवच्या एका खाजगी हॉस्पिटलांत जातलें. उपरांत 3 ते 4 ऑक्टोबरा मजगतीं ताचेर शस्त्रक्रिया करतले, अशी म्हायती डॉ. अपुर्वा हांणी दिली.
मुरगांव बंदराच्या बर्थ नं. 9 चेर इटालीची विमानवाहू बोट 1 ते 4 मजगतीं धक्याक लागतली. ही बोटीर पुराय तांकीन काम करपी हॉस्पिटल आसा. स्कॅनींग गोंयांत जातलें आनी शस्त्रक्रिया हे बोटीर जातली, अशें डॉ. अपुर्वा हांणी सांगलें.
हे विशीं आमी सोशल मिडियाचेर जागृताय केल्ली. आतां मेरेन आमकां सुमार 50 नोंदण्यो आयल्यात. सगळ्यांचें पयलीं स्कॅनींग जातलें. हे बोटीर दोन ऑपरेशन थिएटरां आसात. दिसाक आमी 10 शस्त्रक्रिया करपाची मोख दवरल्या. शस्त्रक्रिये सयत तांचीं वखदां लेगीत मुफत दितले. जर फुडाराक कसलीय समस्या उप्रासली ताचें निवारण गोंय दांत म्हाविद्यालयांत जातलें. ह्या भुरग्यांच्या मुखामळार हांसो हाडप ही आमची मोख आसा, अशें डॉ. अपुर्वा हांणी म्हणलें.
बाळक चार म्हयन्यांचें आसतना कातरो पडिल्ल्या ओंठाची शस्त्रक्रिया करपा खातीर ही योग्य पिराय. ताचे उपरांत शस्त्रक्रिया करप खुबूच कटकटीची आसता. पूण चडशे पालक जल्मायक येताच भुरग्याच्य ओंठाक कातरो आसत जाल्यार ताचेर उपाय करिनात. पूण जेन्ना तांकां आतां वेळ आयला, तेन्नाच ते येतात. पूण चडशे पालक हे गजालीचेर चड लक्ष दिनात, अशें डॉ. अपुर्वा म्हणटा. आमचें हॉस्पिटल चॅरिटी करता. ते खातीर कोणूय गरजू आमच्या हॉस्पिटलांत येतात तेन्ना तांची शस्त्रक्रिया आमी मुफत करतात. पूण जांची वर्सुकी येणावळ आठ लाखां वयर आसा तांचें आमी 80 हजार रुपया शुल्क घेतात. पूण हेर खाजगी हॉस्पिटलांनी हाचो खर्च लाखां वयर वतलो. देखून हे संदीचो गरजेवंतांनी लाव घेवचो आनी नोंदणी करपांखातीर डॉ. अपुर्वा (9650708631), डॉ. नैनिका कृष्णन (9880657081) आनी डॉ ए आर थेन्नारासू (9092663216) हांचे कडेन संपर्क करचो, असो उलो डॉ. अपुर्वा हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
