भांगरभूंय | प्रतिनिधी
पेडणें: वट्ट सात दिसां उपरांत ओंकार हती तांबोशेंच्यान शेजारच्या उगवें शेत मळ्यांत पावलो. तांबोशें गांवांतल्या शेतकारांचे कवाथे, भात, शेती, केळींची वाट लायले उपरांत आतां ओंकार उगव्यां गांवांत व्हडा प्रमाणात केळीं, कवाथे, भात, शेतां सोंपोवपाक पावलो. हाका लागून हांगचे शेतकार बरेच भियेल्यात. उगव्यां गांवांत प्रवेश केले उपरांत सगल्या गांवच्या लोकांक, शेतकारांक ओंकाराची म्हायती मेळ्ळे उपरांत शेतकारांनी आपल्या शेतांनी, बागायतीन वचपाचें बंद केलां. मात रान खात्याचे कर्मचारी हातांत गर्नाल (बाॅम्ब) घेवन, शेत, मळ्यांनी पयस रावून हती खंय येता-वता हाचेर नदर दवरून आसात.
हतयाक धरपा खातीर एक तज्ञ टीम महाराष्ट्र भागांतल्यान पाविल्ल्याची म्हायती मेळ्ळ्या. तज्ञ हती स्वार हतयां वांगडा ओंकाराक धरपाक जो मेरेन येनात तो मेरेन ताका धरप कठीण आसा. असो अदमास आसा. जाल्यार रान खात्याचे मंत्री विश्वजीत राणे हांणी दसरोत्सवा उपरांत तज्ञ हती स्वरांक प्राचार्य करून ओंकाराचो बंदोबस्त करतले.
तो मेरेन ओंकार हतयान शेताची व्हडा प्रमाणांत नासाडी करपाची? असो प्रस्न कॉंग्रेसीचे फुडारी एडवोकेट जितेंद्र गांवकार हांणी हाजीर केलो. ह्या हतयाचो बेगोबेग बंदोबस्त करचो, अशी मागणी शेतकारां वांगडाच एडवोकेट जितेंद्र गांवकार, शेतकरी उदय महाले, शशिकांत महाले, सरपंच सुबोध महाले आनी हेरांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
