भांगरभूंय | प्रतिनिधी
शेंकड्यांनी किलोमिटर प्रवास करून गोंय- सिंधुदुर्ग शिमेर पाविल्लो ओंकार हती फाटले कांय दीस पेडणें वाठारांत हेडटा. सध्या तो तांबोश्यां आसा. व्हिडियो पळयल्यार हो पूर्ण वाड जाल्लो हती न्हय, तें पील कशें दिसता. तरीय ताका तशें सहज धरप सोंपें न्हय. रानां मंत्र्याच्या मतान, उणेच 7 -8 हती हाडून ताका धरचो पडटलो. कर्नाटक सरकारा कडेन गोंयान तशी मजत मागल्या खंय. म्हणटकच ओंकार आनीक कितलें लुकसाण करतलो, तें ताकाच खबर. भूक लागली काय तो भात, केळीं, कवाथे, भाजी, फळभाजी मेळत तें खाता. उदकांत न्हाता. ताका गोंय सोडीन दिसना, इतलें मात खरें. पूण, हें गोंयकारांक भिरांकूळ थारपाक शकता, हाचो विचार सरकारान करपाक जाय. व्हिडियोंत तो माणसाळ्ळा तें जाणवता. उलो मारल्यार तो येता, सोंड मुखार करून वास घेता. पांयान माती उडयता. हाचो अर्थ ताका मनीस आवडटात, असो घेवंक जायना. तो संकश्टाचो अदमास घेता आसतलो. माती उडोवन आपले लागीं येवं नाका, अशी शिटकावणीय दिता आसतलो. तेन्ना ताका हाताळपाचें काम फक्त जाणकारांनूच करपाक जाय. हो दारांनी भीक मागपाक भोंवतात, त्या मनशांनी पोशिल्लो हती न्हय, इतलेंच सगल्यांनी मतींत दवरचें. ओंकाराक खावपाक घालप आंगलट येवं शकता. कारण तशें केल्यार तो लोकवस्तींत येवपाची भिरांत आसा.
विदेशांत दुर्घटना जाली जाल्यार तपास, मजत यंत्रणा रोखडीच येता, हेलिकाॅप्टर बी वापरून मजत करता. जनावरांचोय बंदोबस्त करपी रानां कर्मचारीय थंय आसात. खंयचेय जनावर धरपाक ते फिशाल. गोंयांतूय किंग कोब्रा, साळ, दुकर बी धरपाक रानां कर्मचारी वतात. मात, हतयाक धरपाचें गिन्यान घडये तांकां आसचें ना. नाजाल्यार आतां मेरेन ते ओंकाराक धरपाचे. हती, गवे, बिबटे, वानर, मानगे बी धरपाचें तांकां प्रशिक्षण दिवंक मेळना? जनावराक बेशुद्ध करपाचें इंजेक्शन (ट्रँक्विलायझर) दिवपाक कळपाक जाय. म्होंवा मुसय हाताळपाक शिकल्यार बरें. कारण हांचो उपद्रव गोंयांत जाताच. सांवार कांडपी जनावरांचो सगल्यांत पयलीं बदोबस्त जावप गरजेचें. फोन केला, ट्रॅफिक जामांत आडकल्या आसतली गाडी… हें सगलें खरें आसलें तरी उशीर केल्यार कितेंय जावपाक शकता. ओंकार हती पोटाचे भुकेक नजरेक पडटा तें खायत सुटला. फाल्यां कांय मेळूंक ना वा कोण ताचे वाटेक गेल्यार तो हल्लो करपाक शकता. तशें जाल्यार जापसालदार कोण? व्हीआयपी चड दुयेंत आसल्यार इंग्लंड, अमेरिकेंतल्यान दोतोर हाडटात, तशे ह्या हतयाक धरपाक शेजराच्या राज्यांतल्यान मनीस, प्रशिक्षीत हती हाडप शक्य ना? गुंगेचें वखद घाल्लो बाण बंदुकीन मारून हतयाक बेशुद्ध करुं येता. मात तो शुद्धीर येवचे पयलीं ताका बंदिस्त जाग्यार वा प्राणीसंग्रहालयांत व्हरून दवरूंक जाय. रानां कर्मचाऱ्यांक घडये हाचेंय प्रशिक्षण नासतलें.
हती आसा, त्या वाठारांतले शेतकार शेतांत वचना जाल्यात. हाचो तांचे दिसपट्टे जिणेचेर परिणाम जाला. नशिब, तो हती फुर्योज जावन तांचे फाटल्यान धांवना. ओंकार कळपा पसून वेगळो जाला अशें म्हणटात, पूण तो बरें – बरें रुचीक खावपाक मेळटा म्हूण आयलाय आसूं येता. आवाज करप, माराण मारप, हाॅर्न वाजोवप सदांच फायद्याक पडटलें अशें ना. हती आबूज जावं येता. ताका पळोवपाक वचपूय धोक्याचें. रातचो दिवो पेटोवन उजवाड करीत जाल्यार हती लागीं येना अशें म्हणटात. मात हें जाणकारांक चड खबर. हतयांचो पंगड हाडून ताका फुसलावन धरप आनी मूळ कळपांत व्हरून सोडप चड बरें. तो कळप चंदगडा आसा, अशें कळटा. चर्चा, सल्ल्यां परस गरज आसा ती कृतीची!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
