भांगरभूंय | प्रतिनिधी
उगवेंच्या शेतकारांची शिटकावणी
पेडणें: ओंकार हतयाचो खेळ केन्ना सोंपतलो? कसले वायट गजालीची, घडणुकेची वाट पळयनात न्हय? शेतकारांचो सरकाराक प्रस्न. हती मरतलो काय मनीस? हाची वाट पळोवं नाकात. अशी शिटकावणी मोपा उगवें सरपंच सुबोध महाले हांणी दिली.
जनावरां आनी मनशाक लुकसाण जावचें न्हय. जनावरांक कितेंय जावन जनावरां मोगींनी धांव घेवचे परस आतांच ताचो बंदोबस्त करचो, अशी मागणी श्री. महाले हांणी केली. रेंव उसपप चालू आसतना लोकांक कायदो हातांत घेवचो पडलो. जाल्यार आतां हतयान लुकसाण केले उपरांत, लोकांनी कायदो हातांत घेवचे पयलीं सरकारान ओंकार हतयाचो बंदोबस्त करचो, अशें मत तांणी उक्तायलें. गरज पडल्यार लोक आनी शेतकारां वांगडा आपूणय रस्त्यार येतलों अशी शिटकावणी तांणी दिली.
ओंकार हतयान तिसर्या दिसा उगवें वाठारांतल्या बागायतींचें लुकसाण करपाक सुरवात केल्या. हतयान कवाथे, केळम्यां वांगडाच दोन वाहनांचें व्हडा प्रमाणांत लुकसाण केलां. आतां शेतकारांक लुकसाण भरपाय दिवचे पयलीं रान खात्यान ओंकार हतयाचो बंदोबस्त करचो अशें महाले हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
