भांगरभूंय | प्रतिनिधी
कवाथे, केळम्यांचें व्हड प्रमाणार लुकसाण; शेतकार बेजार
भांगरभूंय । प्रतिनिधी
पेडणें : 30 नोव्हेंबरा सावन ओंकर हतयान तोरसे वाठारांत व्हड प्रमाणांत लुकसाण करपाक सुरवात केल्या. ओंकार हती कशे तरेन कवाथे, केळम्यांची वाट लायता तें पळोवपा बगर रान खात्याचे कर्मचारी, अधिकारी कांयच करपाक शकनात. सरकारान अजून मेरेन ह्या हतयाचो बंदोबस्त करचे खातीर यंत्रणा उपलब्ध करून दिवंक ना. ते खातीर शेतकार लेगीत बेजार जाल्यात.
ओंकार हतयान 30 नोव्हेंबरा सावन पेडणें म्हालांतल्या फकीर फाटा, उगवें, तांबोशें, निगळे तोरशें असो प्रवास करीत करीत परतून तोरसे वाठारांत राबितो करून कवाथे, केळम्यांची वाट लावपाक सुरवात केल्या. शेट्ये वाडो तोरश्यां 7 डिसेंबराक दनपारां 12 वरांच्या सुमाराक हतयान गोविंद शेट्यो, कृष्णा शेट्ये, सुभाष शेट्ये, मंगेश शेट्ये ह्या शेतकारांच्या केळम्यांची, कवाथ्यांची वाट लावन लाखांनी रुपयांचें लुकसाण केलां. तशेंच ताणें गोविंद शेट्ये हांच्या गोठ्यांतल्या कांय यंत्रणेची नासधूस केली. ते भायर शिवराम शेट्ये, नकुल शेट्ये, एकनाथ शेट्ये, ओंकार शेट्ये ह्या शेतकारांचेंय लुकसाण करपाक सुरवात केल्या. ओंकार हतयाचो बंदोबस्त करचो, अशी शेतकारांनी सरपंच प्रवीण आर्लेकार हांचे कडेन मागणी केल्या. थळाव्या शेतकारां कडेन संपर्क केलो तेन्ना तांणी सांगलें, आमी पयसुल्ल्यान उदक हाडून बागायती शिंपल्यात. हती थंय मेरेन पावलो जाल्यार आमचे सगले कश्ट फुकट वतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
