भांगरभूंय | प्रतिनिधी
मुळांतूच ताच्या आंगाक पळयल्यार रोखडेंच कळटा की तो पिरायेन भुरगो. तो आक्रमक ना. ताचे संथ आनी आरामशीर चालीक लागून तो सगल्याकूच जाय जायसो दिसता.
गोंय आनी महाराष्ट्राचे शिमेचेर आशिल्ल्या गांवांतल्या लोकां खातीर ओंकार हती हो एक आपुलकेचो विशय जाला.
तेरेखोल न्हंयेची देग धरीत तो सध्या वावुरता. हालींच्या काळांत वाडिल्लीं रानां कापिल्ल्यान हती आनी रानदुकरांनी शिमे वयल्या गांवांनी खूब लुकसाण केलां. ह्या दोनूय जनावरांक लागून गांवांनी भंयाचे वातावरण निर्माण जालां. पूण ओंकार हती हाका आडवाद थारतना दिसता.
तेरेखोल न्हंय मार्गान ओंकारान कर्नाटकांतल्यान गोंय आनी महाराष्ट्रांत प्रवेश केलो आनी तेरेखोल लागसारच्या गांवांनी ताची हालचाल वाडल्या. सदांच लोकांच्या संपर्कांत राविल्ल्यान तो माणसाळटना दिसता. सिंधुदुर्ग आनी गोंयचे शिमे वयल्यान व्हांवपी तेरेखोल न्हंयेच्यो दोनूय वटो शेतवडीन भरिल्ल्यो आसात. ह्या वाठारांत नाल्ल, केळीं, सुपारी हांच्यो व्हडल्यो बागो, पोरसां, बागायती. ताका लागून ह्या हतयाक खावपाक जाय तितलें मेळटा. देखून तो ह्या वाठारांतल्या गांवांनी बस्तान ठोकून रावला.
ओंकाराक हेर हती परस वेगळी वळख दिवपी वेगवेगळीं खाशेलपणां आसात. मुळांतूच ताच्या आंगाक पळयल्यार रोखडेंच कळटा की तो पिरायेन भुरगो. तो आक्रमक ना. ताचे संथ आनी आरामशीर चालीक लागून तो सगल्याकूच जाय जायसो दिसता. धवे दांत, ताचेर कानांची हालचाल. ह्यो सगळ्यो गजाली ताका हेर हतीं परस वेगळो करतात. सुमार दोन म्हयने गोंय आनी महाराष्ट्राचे शिमेचेर आशिल्ल्या गांवांनी ओंकार मुक्तपणान भोंवता. आयज ताका ल्हान ते जाण्टे मेरेन सगळ्यांक जाय जायसो दिसूंक लागलां. आयज तुमकां ओंकाराचो फोटो वा व्हिडियो नाशिल्लो एकूय मोबायल मेळचो ना. आयज ओंकारान सोशल मिडियाचेर तशेंच हांगाच्या लोकांच्या मनांत पुरायपणान आपली छाप सोडल्या, तो दरेका गांवांत भोंवत आसा.
ओंकार म्हणटकच तो फाटीं वळून आपल्या सोंडयेन जाप दिता. केन्ना न्हंयेंत बरोच न्हावपाचो आनंद घेता, केन्ना शेतांत खेळटना, केन्ना आंगणांत येवन तण खातना अश्यो ताच्यो लीला पळोवन सगलेच ताचे व्हिडियो घेतात. आतां मेरेन ओंकारान चड व्हडलेंशें लुकसाण करूंक ना. घडये आपल्या कळपांतल्यान पयस गेल्ल्या ओंकारांक मनशाचो कळप आपलोच अशें दिसूंक लागलां.
आतां मेरेन ओकाराच्या सगळ्या संचाराचो नियाळ घेतल्यार एक गजाल जाणवता ती म्हणल्यार ओकार केन्नाच खंयच्याच गांवांत एका दिसा परस चड काळ रावूंक ना. खावपा – पिवपाच्यो सगळ्यो सुविधा आसून लेगीत तो एकेच सुवातेर थीर जावंक ना. हाचे वयल्यान आमी समजूंक शकतात की ओंकार कोणाक तरी सोदता हें निश्चीत. आपलो कळप, आपलें कुटुंब खंय आसा? तो दीस रात भोंवता, तो आमचो, ताणें आतां मेरेन कोणाक त्रास दिवंक ना. कोणाक लुकसाण करूंक ना, हाचे वयल्यान आमी समजूंक शकतात की ताचो हेरांक त्रास दिवपाचो हेतू ना. आयज ओंकाराक समजून घेवप गरजेचें. ताची दीस- रात भोंवप आमकां मनोरंजक दिसूं येता, घडये ताका ती आपलें कुटुंब सोदपाचो संघर्श आसूं येता. आयज आमकां जाय अशें दिसपी ओकाराच्या मानसीक स्थितीचेर आमी इतलो विचार केल्लो ना, आयज तो आमचे मदीं भरसून, मुक्तपणान रावता जाल्यार मागीर ताणें तुमचें आनी आमचें मनीसपण नक्कीच वळखून घेतलां. आयज ताणें आमचेर विस्वास दवरला. जर तो एक प्राणी आनी आमचेर इतलो विस्वास दाखयता जाल्यार, मागीर आमी ताचे फाटल्यान एक मनीस म्हणून उबे रावपाची गरज आसा. हो मोग फकत सोशल मिडिया स्टेटसा खातीर न्हय, तर ताच्या कुटुंबा मेरेन पावोवपा खातीर. नाजाल्यार ताका जिणेचो पुराय आनंद घेवपाची सुवात दिवप गरजेचें. जरी ह्यो गजाली प्रशासनाच्या हातांत आसल्यो तरी, पूण आमी आमच्या ओंकारा खातीर हो यत्न करप ही आमची सगळ्यांची जापसालदारकी.
गौरेश जाधव
80106 40931
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
