भांगरभूंय | प्रतिनिधी
सात दिसांच्या राबित्यांत कवाथे, केळमे, शेतांची नासधूस
भांगरभूंय । प्रतिनिधी
पेडणें : सात दिसां उपरांत ओंकार हती तांबोशे गांवांतल्यान शेजारच्या उगव्यां शेतांनी पावलो. तांबोशें गांवांतले कवाथे, केळमे, शेतांची व्हड प्रमाणांत नासधूस केली. आतां ओंकार उगव्या पाविल्ल्याची खबर कळटाच, गांवांतल्या शेतकारांनी शेतांत, बागायतींत वचपाचें सोडलां. रानां खात्याच्या कर्मचाऱ्यांनी हातांत गंडेल घेवन पयस रावून हतयाचेर पाळत दवरल्या.
महाराष्ट्रांतल्यान पंगड अर्दे वाटेर
ओंकार हतयाक धरचे खातीर महाराष्ट्रांतल्यान तज्ञांचो पंगड गोंयांत येवपाक भायर सरला अशी म्हायती सुत्रां कडल्यान मेळ्ळ्या. रानां मंत्री विश्वजीत राणे हांणी म्हणलां, दसऱ्या उपरांत हतयाक धरपाक तज्ञांचो पंगड येतलो. ते मेरेन हतयाक शेतांची नासाडी करपाक दिवची काय कितें, असो प्रस्न काँग्रेसीचे फुडारी अॅड. जितेंद्र गांवकार हांणी उपस्थीत केला. जाता तितले बेगीन हतयाचो बंदोबस्त करचो अशी मागणी अॅड, जितेंद्र गांवकार, शशीकांत महाले, सरपंच सुबोध महाले हांणी केल्या.
तांबोशें गांवांतल्या सात दिसांच्या राबित्यांत हतयान तांबोशेंच्या शेतकारांचें लाखांनी रुपयांचें लुकसाण केलां. त्या शेतकारांक लुकसाण भरपाय केन्ना मेळटली, असो प्रस्न शेतकारांनी उपस्थीत केला. कारण शेतकी खात्याच्या अधिकाऱ्यांनी अजून मेरेन पिडीत शेतकारांची भेट घेवंक ना. शेतां, भाटांनी, कुळागरांनी वचून कितलें लुकसाण जलां, हाचो अदमास लेगीत अजून मेरेन शेतकी विभागा वतीन काडूंक ना.
हे संबंदांत सरपंच सुबोध महाले हांचे कडेन संपर्क केलो तेन्ना तांणी सांगलें, फाटल्या सात दिसा सावन हती तांबोशें गांवांत आशिल्लो. आयजूच (बुधवारा) तो उगवें वाठारांत पावला. हती तांबोश्यां सात दीस आसलो त्या काळांत ताणें कितलें लुकसाण केलां ताची अजून शेतकी विभागान पळोवणी करूंक ना. शेतकारांक चडांत चड लुकसाण भरपाय मेळची हे खातीर आपूण यत्न करतलों. तशेंच ह्या हतयाचो जाता तितले बेगीन बंदोबस्त करपाची मागणी करतलों, अशें तांणी सांगलें.
उगवेंच्या शेतकारांक शेतांचो हुस्को
उगवे गांवांतल्या शेतकारांच्यो शेतजमनी मोपा विमानतळा खातीर गेल्यात. कांय जमनी तेरेखोल न्हंयेन गिळ्ळ्यात. तेरेखोल न्हंयेंतल्यान व्हड प्रमाणांत रेंव काडिल्ल्यान न्हंयेचें पात्र रूंद जायत गेलें. हाका लागून कितलेशीच चौखण मिटर जमीन तेरेखोल न्हंयेच्या उदका पोंदां गेली. जी जमीन उरल्या तीं शेतकारांनी कसल्या. कवाथे, माडयो, केळमे, शेतां रोयल्यांत. हती ताचे लुकसाण करतलो, हो भंय शेतकाराक सतयता. कांय शेतकार आपल्या शेताची राखण करपाक शेतांत वचपाक सोदतात जाल्यार रानां खात्याचे कर्मचारी तांची वाट आडयतात. हती हल्लो करपाक शकता, अशें सांगून ते शेतकारांक सादुरकार बाळगुपाचो उलो मारतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
