भांगरभूंय | प्रतिनिधी
मूळ जमीन पार्सेकार हांची, पूण दिल्या लिजार
भांगरभूंय । प्रतिनिधी
पेडणें : हरमलच्या ‘ऑॅथेल्लो’ ह्या रॅस्टोरंण्ट आनी रिसॉर्टाचेर प्रशासनान व्हड कारवाय केल्या. हरमलच्या खाजन जमीन आनी मिठागराचे सुवातेर कसलेच शासकीय परवानगे बगर बेकायदा बांदकाम केल्ल्याचो ठपको दवरून, पेडणें उपजिल्होधिकारी शिवप्रसाद नायक हांणी हें पुराय संकुल बेगोबेग सील करपाचे काल आदेश दिल्ले. उपरांत आयज हाका कुलूप घालें. हे विशीं चड म्हायती प्रमाण जंय हें रिसॉर्ट उबें आसा ती जमीन आदले मुख्यमंत्री लक्ष्मीकांत पार्सेकार हांचे मालकीची, कोणाक ती लिजीचेर दिल्ली.
पेडणें मामलेदार आनी तलाठी हांणी सादर केल्ल्या अहवाला प्रमाण, हरमलच्या सर्वेक्षण नंबर 52/1 हे सुवातेर सुमार 700 चौखण मिटर क्षेत्रफळार हें रॅस्टोरंण्ट, लांकडी खाटी आनी कायमस्वरूपी प्लिथं बांदलां. विशेश म्हणल्यार, उदकाचो प्रवाह आशिल्ल्या वाठारांत लांकडी पूल आनी रस्ते उबारतना प्राधिकरणाची कसलीच सनद वा परवानगी घेवंक ना. सरकारी महसूल नोंदी प्रमाण ही सुवात मिठागराची जमीन म्हणून नोंद केल्या. प्रादेशीक आराखडो आनी सर्वेक्षण आराखड्यांतूय हे सुवातेचो उल्लेख जलस्रोत आनी मिठागर असोच आसतना, जंय वेवसायीक वापर सुरू आशिल्ल्याचें तपासांत निश्पन्न जालें.
उपजिल्होधिकार्यांनी ह्या आदेशाची अंमलबजावणी करपा खातीर पेडणें मामलेदारांक काल निर्देशीत केल्या उपरांत संबंदीत सुवात रिकामी करून ती आयज रोखडीच सील केली. हे कारवाये मजगतीं कसलोच कायदो आनी सुवेवस्थेचो प्रस्न निर्माण जावचो न्हय, हे खातीर पेडणें उपअधीक्षक आनी मांद्रें पुलीस निरिक्षकांक गरजेचो सशस्त्र पुलीस बंदोबस्त तैनात केल्लो.
ताचे परिणाम तांणी भोगचे : पार्सेकार
हांव हॉटेल चलयना. हांव शाळा आनी सोसायट्यो चलयतां. संबंदीत दोन प्रॉपर्टीज हांवें दुसर्या एका मनशाक लिजाचेर दिल्ल्यो. हांव फकत जमनीचो धनी आशिल्ल्यान म्हाका ताचें भाडें मेळटा. ते जमनीर जर कोणेंय बेकायदेशीर वेवसाय वा बांदकाम केल्यार ताची सगली जापसालदारकी त्या भाडेकरूची आसा. जें कितें चुकीचें केलां जाल्यार ताचे परिणाम तांणी भोगचे, अशें लक्ष्मीकांत पार्सेकार हांणी पत्रकांनी विचारिल्ल्या प्रस्नाक जाप दितना स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
