भांगरभूंय | प्रतिनिधी
राष्ट्रकूल खेळाचे फायनलींत ऑस्ट्रेलिये कडल्यान मेळिल्ली हार पचोवप खूब कठीण आसा, पूण तरी आसतना ही हार विसरून आमकां मुखार वचपाक जाय अशें भारताच्या हॉकी पंगडाचो स्टार ड्रॅग फ्लिकर हरमनप्रीत सिंग हांणी म्हणलां.
ऑस्ट्रेलियेन भारताक 7-0 अशा गोल फरकांनी हारयिल्लो. हे हारीक लागून भारताचें भांगरा पदक जिखपाचें सपन भंगिल्लें.
येद्या व्हड फरकान मेळिल्ली हारी पचोवपाक कठीण आसा. पुर्ण पंगड ह्या प्रदर्शनाक लागून निर्शेला. पूण, ही हार विसरून मुखार वचप गरजेचें आसा अशें ताणें मुखार म्हणलें.
ऑस्ट्रेलिये सारक्या पंगडाचे उर्जा आनी लय कडेन आमी बरोबरी करपाक शकले नात अशें मॅच हारल्या उपरांत मुख्य प्रशिक्षकान म्हणिल्लें.
अशा मॅचींतल्यान आमी साबार धडे घेतल्यात आनी ताचेर काम करचें पडटलें. दोन सप्तकां उपरांत आमी शिबिरांत वांटो घेतले आनी दरेक मॅचीची समिक्षा करतले आनी नव्यान सुरवात करतले अशें हरमनप्रीत सिंगान सांगलें.
हरमनप्रीत सिंगान सर्तींत णव गोल केले आनी सगल्यांत चड गोल करपाचे वळेरेंत दुसरी सुवात मेळयली. पयली सुवात वेल्साच्या जेरेथ फर्लोगान मेळयली.
वैयक्तीक दिश्टीन सर्त आपले खातीर फायद्याची थारली. कोरोना महामारी उपरांत पयले खेपे व्हडा संख्येन उपस्थीत आशिल्ल्या प्रेक्षकांच्या मुखार खेळ्ळे. साबार भारतीय हॉकी मोगी मॅच पळोवपाक आयिल्ले. राष्ट्रकूल खेळां सर्तींत आपणेन पयले खेपे पदक जिखलें. ताका लागून आपले खातीर ही सर्त खाशेली थारली अशें ताणें मुखार म्हणलें.
भारत आतां ऑक्टोबरांत एफआयएच प्रो लिगेंत वांटो घेतलो. हे सर्तीची तयारी करपाक खेळगडे रोखडेच शिबिरांत वांटो घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
