भांगरभूंय | प्रतिनिधी
संवसारीक टॅस्ट वस्तादपण सर्तीचे फायनली खातीर ऑस्ट्रेलियेन आपलो 17 वांगड्यांचो पंगड वेंचलो. फायनल 7 ते 11 जून मेरेन इंग्लंडाच्या ओव्हल मैदानाचेर चलतली.
फायनल ऑस्ट्रेलिया आनी भारत ह्या पंगडां मदीं जातली. भारत सेगीत दुसरे खेपे फायनलींत पावला. 2021त जाल्ले फायनलींत ताका न्युझिलॅण्डा कडल्यान हार घेवची पडिल्ली.
ऑस्ट्रेलियेन संवसारीक टॅस्ट वस्तादपण सर्तीचे फायनली खातीर आनी अॅशेस माळेच्या दोन टॅस्टीं खातीर पंगडाची घोशणा केली. फायनली खातीर मिचेल मार्शाची निवड केल्या. ताचें चार वर्सांनी टॅस्ट पंगडांत पुनरागमन जालां. दोन म्हयने आदीं भारताचे भोंवडेर नागपूर टॅस्टी वरवीं पदार्पण करपी स्पिनर टॉड मर्फीक लेगीत पंगडांत सुवात फावो जाल्या.
मिचेल मार्शाक भारता आडचे वन डे माळेंत केल्ल्या उत्कृश्ट प्रदर्शनाचें इनाम फावो जालें. ताका टॅस्ट पंगडांत सुवात दिवंक नाशिल्ली. पूण, वन डे खातीर ताचो पंगडांत आस्पाव केल्लो. ताणें 2019त आपली निमाणी टॅस्ट खेळिल्ली. मार्शान भारताचे भोंवडेर तीन वन डे मॅचींनी खेळटना 97चे सरासरीन 194 धांवड्यो केल्ल्यो.
तशेंच मार्कस हॅरिसाची लेगीत फायनली खातीर निवड केल्या. ओपनराचो बॅकअप म्हणून निवड केल्या. जाल्यार जोश इंग्लीश पयले खेपे टॅस्ट पंगडांत सुवात दिल्या.
फायनली खातीर निवड समितीन आक्रमक ओपनर डॅव्हिड वॉर्नराचेर भरवसो दवरला. भारता आडचे टॅस्ट माळेंत ताका व्हड खेळी करपाक जमूंक नाशिल्ली.
फायनली खातीर वेंचिल्लो पंगडः पॅट कमिन्स (मुखेली), स्कॉट बोलॅण्ड, एलेक्स कॅरी, कॅमरुन ग्रीन, मार्क हॅरिस, जोश हेझलवूड, ट्रॅव्हीस हेड, जोश इंग्लीश, उस्मान ख्वाजा, मार्नस लाबशेन, नॅथन लियोन, मिचेल मार्श, टॉड मर्फी, मॅथ्यू रेन शॉ, स्टीव स्मिथ (उप मुखेली), मिचेल स्टार्क आनी डॅव्हिड वॉर्नर.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
