भांगरभूंय | प्रतिनिधी
येजमान भारतान ऑस्ट्रेलिये आड चालू आशिल्ले चवथे टॅस्टीच्या दुसऱ्या दिसाचो खेळ सोंप मेरेन बिनबाद 36 धांवड्यो केल्यात. मुखेली रोहित शर्मा आनी शुभमन गिल सध्या खेळपट्टीचेर आसा. ते पयलीं उस्मान ख्वाजा (180) आनी कॅमरुन ग्रीन (114) हांच्या शेंकड्यां नेटार पयल्या डावांत 480 धांवड्यो केल्यो. भारता वतीन आर आश्विनान स आनी मोहम्मद शमीन दोन विकेटी घेतल्यो.
ओपनर उस्मान ख्वाजान ऑस्ट्रेलिये वतीन सगल्यांत चड 180 धांवड्यांची खेळी केली. जाल्यार कॅमरुन ग्रीनान आपलो पयलो टॅस्ट शेंकडो पुर्ण केलो. ख्वाजा-ग्रीन हांचे खेरीत टॉड मर्फीन 41, मुखेली स्मिथान 38, नॅथन लायनान 34 आनी ट्रॅव्हिस हेडान 32 धांवड्यांचें योगदान दिलें.02
मजगतीं, दुसऱ्या दिसाच्या पयल्या सत्रांत बॉलरांक खेळपट्टींतल्यान चड मजत मेळूंक ना. ताका लागून ऑस्ट्रेलियेच्या बॅट्समनांनी आपलो शेक दवरलो. जेवणाच्या विसवा मेरेन ख्वाजा आनी ग्रीन हाणें मेळून पंगडाचो स्कोर 4 बाद 347 धांवड्यां मेरेन पावयलो. ख्वाजान 150 धांवड्यो पुर्ण केल्यो जाल्यार ग्रीन 95चेर नाबाद उरलो. ह्या सत्रांत 92 धांवड्यो केल्यो. जाल्यार भारताक एकूय विकेट मेळूंक ना.
ख्वाजा आनी ग्रीन हांणी दुसऱ्या दिसाची सुरवात 4 बाद 255 धांवड्यां वयल्यान सुरवात केल्ली.
दोगांयनी पांचवे विकेटी खातीर 208 धांवड्यांची भागिदारी केली.
दुसऱ्या सत्रांत आर आश्विनान भारताक मॅचींत हाडलो. ताणें ऑस्ट्रेलियेचो एका फाटल्यान एक तीन विकेटी घेतल्यो. ह्या सत्रांत ऑस्ट्रेलियेन 62 धांवड्यांचेर ग्रीन, कॅरी आनी स्टार्क हांच्यो विकेटी वगडायल्यो.
ते उपरांत टॉड मर्फी (41) आनी नॅथन लायन (34) हांणी णववे विकेटी खातीर 70 धांवड्यांची भागिदारी करून भारताक घाम काडलो. मर्फीचो पयले श्रेणीचे क्रिकेटींतलो हो सर्वोच्च स्कोर थारलो.
भारतान आपल्या डावाक सादुरयातेन सुरवात केली. ताणें 10 ओव्हरींनी बिनबाद 36 धांवड्यो केल्यो.
मजगतीं, ऑस्ट्रेलियेचे खेळगडे भुजाक काळी पट्टी बांदून खेळ्ळे. काल तांचो सदचो मुखेली पॅट कमिन्साची आवय संवसाराक अंतरली. ताका लागून कमिन्साचे आवयक आर्गां ओंपपाक भुजाक काळी पट्टी बांदली. आवय दुयेंत आशिल्ल्यान कमिन्स भारत भोंवडी अर्दकुटी सोडून घरा परतून गेल्लो. ताचे गैरहाजेरेंत स्टिवन स्मिथान पंगडाचें फुडारपण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
