भांगरभूंय | प्रतिनिधी
येजमान इंग्लंडा आड चालू आशिल्ले अॅशेस माळेचे दुसरे टॅस्टीच्या दुसऱ्या दिसा ऑस्ट्रेलियेचो पयलो डाव 416 धांवड्यांचेर सोंपलो. स्टिव स्मिथान 110 धांवड्यांची खेळी केली. ताचे खेरीत डॅव्हिड वॉर्नरान 66 आनी ट्रॅविस हेडान 77 धांवड्यांचें योगदान दिलें. ह्या तिगां खेरीत हेर बॅट्समनांक व्हड खेळी करपाक जमली ना.
निमाणी बातमी मेळ्ळी त्या वेळार इंग्लंडान आपल्या पयल्या डावांत 4 विकेटी वगडावन 227 धांवड्यो केल्यो. ताचो ओपनर बेन डकेट 98 धांवड्यांचेर बाद जालो. ओली पोपान 42 आनी झेक क्रॉवलीन 48 धांवड्यो केल्यो.
मजगतीं, ऑस्ट्रेलियेचो स्टार बॅट्समन स्टीव स्मिथान 32वो शेंकडो पुर्ण केलो. पयल्या दिसा तो 85 धांवड्यांचेर नाबाद आशिल्लो. ताणें 169 बॉलांनी आपलो शेंकडो पुर्ण केलो. हातूंत 14 चवक्यांचो आस्पाव आशिल्लो. अखेरेक तो 110 धांवड्यो करून बाद जालो.
इंग्लंडा आड स्मिथ धांवड्यांचो पावस घालता. इंग्लंडा आडचो ताचो हो 12वो शेंकडो थारलो. माळेंतले पयले मॅचींत ताका व्हड खेळी करपाक जमूंक नाशिल्ली. पयल्या डावांत 16 आनी 6 धांवड्यो केल्ल्यो.
मजगतीं, स्मिथान ऑस्ट्रेलियेचो आदलो मुखेली स्टिव मार्काच्या 32 शेंकड्यांची बरोबरी केली. टॅस्ट क्रिकेटींत सगल्यांत चड शेंकडे मारपाचो विक्रम सचिन तेंडुलकराच्या नांवार आसा. ताणें 51 शेंकडे मारल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
