भांगरभूंय | प्रतिनिधी
पांच खेपेचो वस्ताद ऑस्ट्रेलिया पंगडान संवसारीक वन डे क्रिकेट सर्तींतली आपली जैताची धांव कायम राखतना लीग फेरयेंतले आपले निमाणे मॅचींत बांगलादेशाक 8 विकेटींनी हारयलो. ताचें हें सेगीत सातवें जैत थारलें. सेमी फायनलीचे दिश्टीन हे मॅचीक व्हड म्हत्व नाशिल्लें. ऑस्ट्रेलियेन पयलींच सेमी फायनलींतली सुवात निश्चीत केल्या, जाल्यार बांगलादेशाचें आव्हान पयलींच सोंपला.
ऑस्ट्रेलियेच्या जैतांत मिचेल मार्श पर्जळ्ळो. ताणें नाबाद 177 धांवड्यांची खेळी केली. पयलीं सेमी फायनलींतली सुवात निश्चीत करपी ऑस्ट्रेलिया सेमी फायनलींत दक्षीण आफ्रिके आड खेळटलो.
हांगाच्या महाराष्ट्र क्रिकेट असोसिएशनाच्या मैदानाचेर टॉस हारल्या उपरांत पयलीं बॅटींग करपी बांगलादेशान निर्धारीत 50 ओव्हरींनी 8 विकेटी वगडावन 306 धांवड्यो केल्यो. तोवहिद हृदोय आनी मुखेली नमजूल होसैन शान्तो हांचे आक्रमक बॅटींगे नेटार बांगलादेशान 300चो आंकडो हुपलो. तनझिज हसन (36), लिटन दास (36) हांणी 11 ओव्हरींनी 76 धांवड्यो केल्यो. नजमूल 45 धांवड्यांचेर बाद जालो. जाल्यार हृदोयान 79 बॉलांनी पांच चवके आनी दोन सक्यांचे मजतीन 74 धांवड्यो केल्यो. महमुदुल्लाह (32), मुश्फीकर रहिम (21) आनी मेहिदी हसन मिराझ (29) हांणी ल्हान पूण म्हत्वाचें योगदान दिलें. बांगलादेशाक निमाण्या 10 ओव्हरींनी 67 धांवड्योच करप शक्य जाल्यो. एबॉट आनी अॅडम झम्पा हाणें दरेकी 2 विकेटी घेतल्यो.
मोखीचो फाटलाव करपी ऑस्ट्रेलियेची सुरवात बरी जाली ना. ओपनर ट्रॅव्हिस हेड (10) तिसरे ओव्हरींत बोल्ड जालो. डॅव्हिड वॉर्नर आनी मिचेल मार्श हांणी 120 धांवड्यांची भागिदारी केली. वॉर्नरान 61 बॉलांनी 6 चवक्यांचे मजतीन 53 धांवड्यो केल्यो. अशे तरेन आंतरराष्ट्रीय क्रिकेटींत 18 हजार धांवड्यो करपी क्रिस गेल आनी सनथ जयसुर्या हांचे उपरांत तिसरो ओपनर थारलो.
मजगतीं, मिचेल मार्शान शेंकडो नोंदोवन ऑस्ट्रेलियेक जैता वटेन व्हेलो. मार्शान 132 बॉलांनी 17 चवके आनी 9 सक्यांचे मजतीन नाबाद 177 धांवड्यो केल्यो. स्टिव्ह स्मिथान 64 बॉलांनी चार चवके आनी एक सक्याचे मजतीन नाबाद 63 धांवड्यो केल्यो. दोगांयनी 135 बॉलांनी 175 धांवड्यांची नाबाद भागिदारी करून ऑस्ट्रेलियेक 44.4 ओव्हरींनी 8 विकेटींनी जैत मेळोवन दिलें.
ऑस्ट्रेलियेन हे मॅची खातीर आपल्या पंगडांत दोन बदल केले. पंगड वेवस्थापनान ग्लॅन मॅक्सवॅल आनी मिचेल स्टार्क हांकां विसव दिवपाचो निर्णय घेतलो. तांचे सुवातेर स्टिव्ह स्मिथ आनी शॉन अॅबॉट हांकां खेळयले. दुसरे वटेन बांगलादेशान तीन बदल केले. तंजीम हसन साकिब, शोरफुल इस्लाम आनी शाकिब अल हसन हांचे सुवातेर मुशफिकुर रहमान, मेहदी हसन आनी नसुम अहमद हांकां संद दिली. शाकिब जखमी आशिल्ल्यान तो हे मॅचींत खेळचो ना हें आदींच स्पश्ट जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
