भांगरभूंय | प्रतिनिधी
पावसाची आडखळ आनी तातूंत अस्थीर स्थिती अशा परिस्थितींत अखेरच्या खिणा मेरेन रंगिल्ले मॅचींत ऑस्ट्रेलियेन अॅशेस माळेंतले पयले टॅस्टींत येजमान इंग्लंडा आड 2 विकेटींनी जैत जोडलें.
बॉलिंगेंत उत्कृश्ट प्रदर्शन करपी ऑस्ट्रेलियेचो मुखेली पॅट कमिन्सान बॅटिंगेंत लेगीत जबरदस्त प्रदर्शन केलें. पंगड संकश्टांत आसतना ताणें नाबाद 44 धांवड्यांची निर्णायक खेळी केली. निर्णायक खिणाक ताका नॅथन लायनाची मोलादीक साथ मेळ्ळी. ह्या दोगांयनी णववे विकेटी खातीर नाबाद 55 धांवड्यांची भागिदारी केली.
ऑस्ट्रेलियेन आठवी विकेट वगडायली आनी लायन मैदानांत देंवलो त्या वेळार तांकां जैता खातीर 54 धांवड्यांची गरज आशिल्ली. लायन आनी कमिन्स हांणी अनपेक्षीत प्रदर्शन केलें. कमिन्सान रुटाचे एके ओव्हरींत मारिल्ले दोन सके ताका आत्मविस्वास मेळोवन दिवपी थारले.
पांचव्या दिसा निमाण्या सत्रा मेरेन रंगिल्ले हे मॅचींत ऑस्ट्रेलियेक निमाण्या दिसा जैता खातीर 174 धांवड्यांची गरज आशिल्ली आनी सात बॅट्समन बाकी आशिल्ले. पूण, पावसाक लागून पयलें सत्र फुकट गेलें.
ते उपरांत खेळ सुरू जाल्या उपरांत इंग्लंडाच्या बॉलरांनी टप्प्या टप्प्यान एकेक बॅट्समन बाद केलो. पूण, उस्मान ख्वाजान एक बाजू सांबाळून धरली. कॅमेरून ग्रीन आनी एलेक्स कॅरी हांणी ताका बरी साथ दिली. पूण, स्टोक्सान ख्वाजाक बाद केल्या उपरांत इंग्लंडाचो जैताचो मार्ग मेकळो जालो अशें दिसपाक लागिल्लें. पूण, मुखेली कमिन्सान मॅच घुंवडायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
