भांगरभूंय | प्रतिनिधी
संवसारीक टी-20 क्रिकेट सर्तीच्या ब गटातले मॅचींत येजमान श्रीलंका पंगडान आदलो वस्ताद ऑस्ट्रेलिया पंगडाक 8 विकेटींनी हारायलो. हे हारीक लागून ऑस्ट्रेलिया पंगडाची सुपर आठांत सुवात मेळोवपाची आस्त लागीं लागीं सोंपिल्ल्यांत जमा जाल्या. दुसरे वटेन श्रीलंका पंगडान सुपर आठांतली आपली सुवात निश्चीत केली. श्रीलंकेचो ओपनर पथुम निसंकान (नाबाद 100) शेंकडो नोंदयलो.
ते आदीं टॉस जिखून पयली बॅटींग करपाचो निर्णय घेवपी ऑस्ट्रेलिया पंगडाची सुरवात आक्रमक जाली. ट्रॅव्हिस हेड (56) आनी मुखेली मिचेल मार्श (54) हांणी पयले विकेटी खातीर 104 धांवड्यांची भागिदारी केली. पूण, श्रीलंकेच्या स्पिनरांनी मदली फळी गडगडावन उडयली. दुशन हेमंथान 37 धांवड्यो दिवन 3 विकेटी घेवन ऑस्ट्रेलियेचो डाव 181 धांवड्यांचेर गुठलावपाक मजत केली. ऑस्ट्रेलिया पंगड पुराय 20 ओव्हरी खेळ्ळो खरो पूण अखेरच्या ओव्हरींनी विकेटी पडिल्ल्यान तांकां व्हड धांवसंख्या उबारपाक जमली ना. निमाण्या पांच बॅट्समनांनी फक्त 10 धांवड्यांची भर घाली.
182 धांवड्यांचो फाटलाव करतना श्रीलंकेची सुरवात सावकाश जाली. कुशल परेरा सवाय भितर बाद जालो. पूण, उपरांत पथुम निसंकान ऑस्ट्रेलियेची बॉलींग फोडून काडली. ताणें 52 बॉलांनी नाबाद 100 धांवड्यांची खेळी केली. हातूंत 10 चवक्यांचो आनी पांच सक्यांचो आस्पाव आशिल्लो. ताका
कुशल मॅण्डिसान बरी साथ दिली. ताणें 38 बॉलांनी 38 बॉलांनी 51 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
