भांगरभूंय | प्रतिनिधी
येजमान ऑस्ट्रेलिया पंगडान सिडनी क्रिकेट मैदानाचेर खेळयिल्ले तिसरे टॅस्टींत पाकिस्तानाक 8 विकेटींनी हारयलो. ह्या जैता सयत तीन मॅचींचे माळेंत ऑस्ट्रेलिया पंगडान क्लीन स्वीप केलें. पाकिस्तानाचो दुसरो डाव फकत 115चेर सोंपलो. पाकिस्तान 14 धांवड्यांनी मुखार आशिल्लो, ताका लागून ऑस्ट्रेलियेक जैता खातीर 130 धांवड्यांची मोख मेळ्ळी.
ऑस्ट्रेलिये वतीन मार्नस लाबुशेनान 62 आनी कारकिर्दींतली निमाणी टॅस्ट खेळपी डॅव्हिड वॉर्नरान 57 धांवड्यो केल्यो.
पाकिस्तान क्रिकेट पंगडाचो ऑस्ट्रेलियेंतलो रॅकॉर्ड सामको बाबत आसा. ताणें ऑस्ट्रेलियेंत सेगीत 17वी टॅस्ट वगडायली. निमाणे खेपे 1995 वर्सा पाकिस्तानान ऑस्ट्रेलियेंक टॅस्ट जिखिल्ली. तेन्ना सावन आतां मेरेन ताची एक मॅच बादाबाद लेगीत उरूंक ना.
पाकिस्तानाचो दुसरो डाव 115चेर सोंपलो. चवथ्या दिसा पाकिस्तानान आपलो दुसरो डावांत तिसऱ्या दिसाच्या स्कोरांत 47 धांवड्यांची भर घाली. तिसऱ्या दिसाचो खेळ सोंप मेरेन पाकिस्तानान दुसऱ्या डावांत 7 विकेटी वगडावन 68 धांवड्यो केल्ल्यो. मोहम्मद रिजवानान 28 धांवड्यांची खेळी केली. आमिर जमालान 18 धांवड्यांचें योगदान दिलें.
ऑस्ट्रेलिये वतीन जोश हेजलवुडान 4 आनी नॅथन लायनान 3 विकेटी घेतल्यो. मोखीचो फाटलाव करपी ऑस्ट्रेलियेची सुरवात बरी जाली ना. पयले ओव्हरीच्या निमाण्या बॉलाचेर ओपनर उस्मान ख्वाजा बाद जालो. तो बाद जाल्या उपरांत वॉर्नर आनी लाबुशेन हाणें ऑस्ट्रेलियेचो डाव सांबाळ्ळो. दोगांयनी मेळून दुसरे विकेटी खातीर 119 धांवड्यांची भागिदारी करून पंगडाक जैताच्या लागसार व्हेलो. वॉर्नरान 75 बॉलांनी सात चवक्यांचे मजतीन 57 धांवड्यो केल्यो. लाबुशेनान 73 बॉलांनी 9 चवक्यांचे मजतीन नाबाद 62 धांवड्यो केल्यो. वॉर्नर बाद जाल्या उपरांत लाबुशेन आनी स्टिव स्मिथ (नाबाद 4) हांणी जैताची औपचारीकताय पुर्ण केली.
क्लीन स्वीप केल्या उपरांत ऑस्ट्रेलियेक वर्ल्ड टॅस्ट चॅम्पियनशिपाचे गुण तकट्यांत लेगीत फायदो जालो. तो पयले सुवातेर पावलो. दुसरे सुवातेर भारत आसा. दक्षीण आफ्रिका, न्युझिलॅण्ड आनी बांगलादेश वळेरेन तिसरे, चवथे आनी पांचवे सुवातेर आसा. पाकिस्तान सवे सुवातेर आसा.
मजगतीं, वॉर्नरान आपले टॅस्ट कारकिर्दीचे निमाणे मॅचींत 37व्या अर्द शेंकड्याची नोंद केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
