भांगरभूंय | प्रतिनिधी
अणभवी डॅव्हीड वॉर्नर आनी स्टिवन स्मिथ हांच्या अर्द शेंकड्यांच्या नेटार येजमान ऑस्ट्रेलिया पंगडान तीन वन डे मॅचींते पयले मॅचींत इंग्लंडाक 6 विकेटींनी हारयलो. हे हारीक लागून इंग्लंडाच्या डॅव्हीड मलानाचो शेंकडो फुकट गेलो. ताणें 129 बॉलांनी 134 धांवड्यो केल्यो. हातूंत 12 चवक्यांचो आनी चार सक्यांचो आस्पाव आशिल्लो. पूण, ताका दुसरे वटेन म्हणपा सारकी साथ मेळूंक ना आनी ताका लागून इंग्लंडाक 9 विकेटी वगडावन 287 धांवड्यो करप शक्य जाल्यो.
प्रत्युत्तर दितना ऑस्ट्रेलियेन 46.5 ओव्हरींनी 4 विकेटी वगडावन 291 धांवड्यो करून जैत जोडलें. वॉर्नरान 86, ट्रॅव्हीस हेडान 69 आनी स्मिथान नाबाद 80 धांवड्यो केल्यो.
अॅरोन फिंचान निवृत्ती घेतल्या उपरांत पॅट कमिन्साच्या फुडारपणाखाला खेळपी ऑस्ट्रेलियेक वॉर्नर आनी हेड हांणी बरी सुरवात करून दिली. दोगांयनी पयले विकेटी खातीर 147 धांवड्यांची भागिदारी करून बरी बुन्याद घाली. उपरांत स्मिथान बरे तरेन जापसालदारकी सांबाळ्ळी.
ते पयलीं इंग्लंडाचो डाव मलानाचे सरभोवतणी घुंवत रावलो. इंग्लंडान नेमान विकेटी वगडायल्यो ताका लागून 300 मेरेन पावपाक ताका अपेस आयलें. मलाना उपरांत दुसरो सर्वोत्कृश्ट स्कोर णवे सुवातेर बॅटिंगे आयिल्ल्या डॅव्हीड विलीचो (नाबाद 34) आशिल्लो. ऑस्ट्रेलिये वतीन फास्ट बॉलर कमिंस आनी स्पिनर अॅडम झम्पा हाणें दरेकी तीन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
