भांगरभूंय | प्रतिनिधी
संवसारीक टी-20 क्रिकेट सर्तींतले म्हत्वाचे मॅचींत येजमान ऑस्ट्रेलिया पंगडान आयर्लेण्डाक 42 धांवड्यांनी हारयलो. गाबा मैदानाचेर जाल्ले मॅचींत आयर्लेण्डान टॉस जिखून ऑस्ट्रेलियेक पयलीं बॅटींग करपाचें आमंत्रण दिलें. ऑस्ट्रेलियेन 20 ओव्हरींनी 5 विकेटी वगडावन 179 धांवड्यो केल्यो. प्रत्युतर दितना आयर्लेण्डाक 18.1 ओव्हरींनी फक्त 137 धांवड्यो करप शक्य जाल्यो. ऑस्ट्रेलियेचो हें दुसरें जैत थारलें. ह्या जैता उपरांत ऑस्ट्रेलियेन पांच गुणां सयत गुणतकट्यांत दुसरे सुवातेर पावलो. पयलीं दुसरे सुवातेर इंग्लंडाचो पंगड आशिल्लो. जाल्यार आयर्लेण्ड तिसरे सुवातेर आशिल्लो. पूण, ह्या जैता उपरांत ऑस्ट्रेलिया दुसरे सुवातेर पावलो.
ऑस्ट्रेलियेचो मुखेली अॅरोन फिंचान सगल्यांत चड 63 धांवड्यो केल्यो. मार्कस स्टॉयनीसान 35 आनी मिचेल मार्शान 28 धांवड्यांचें योगदान दिलें. आयर्लेण्डा वतीन मॅकार्थीन तीन आनी जोशुआ लिटलान दोन विकेटी घेतल्यो. मुखेली अॅरोन फिंचाचें पुनरागमन ऑस्ट्रेलिये खातीर थाकाय दिवपी खबर आसा. फिंचाक योग्य वेळार लय सांपडली.
180 धांवड्यांचो फाटलाव करपी आयर्लेण्डाची सुरवात सामकी बाबत जाली. 25 धांवड्यांचेर ताच्यो पांच विकेटी पडिल्ल्यो. ऑस्ट्रेलिये वतीन कमिन्स, स्टार्क, मॅक्सवेल आनी झम्पा हांणी दरेकी दोन विकेटी घेतल्यो. हेजलवुडाक एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
