भांगरभूंय | प्रतिनिधी
सिडनी, खबरां संस्था: ऑस्ट्रेलियेक आयतारा सोळा वर्सां सकयल्या भुरग्यांक सोशल मिडिया वापरपाचेर बंदी घालपी कायदो संमत केलो. हो कायदो फेसबूक, इंस्टाग्राम आनी स्नॅपचॅट ह्या सगळ्या सोशल मिडियाचेर लागू जाता. नेम मोडल्यार कंपन्यांक ३२ दशलक्ष अमेरिकन डॉलर इतक्या दंडाची तरतूद नव्या कायद्यांत केल्या. भुरग्यांक सोशल मिडियाचेर बंदी घालपी ऑस्ट्रेलिया हो संवसारांतलो पयलोच देश थारलो.
‘सोशल मिडिया मिनिमम एज बिल’ ऑस्ट्रेलियाच्या सेनेटांत ३४ आड १९ मतांनी बिरेस्तारा मंजूर केले. कनिश्ठ सभाघरांत (हावज ऑफ रिप्रेझेंटेटिव्ह्ज) बुधवारा १०२ आड १३ अशा मतांनी ह्या विधेयकाचेर मान्यतायेचो शिक्को लायिल्लो. नव्या कायद्या प्रमाण १६ पिराये सकयल्या भुरग्यांक टिकटॉक, फेसबूक, स्नॅपचॅट, रेडिट, एक्स (ट्विटर) आनी इन्स्टाग्राम ह्या समाजमाध्यमांचेर खातीं उगडपाक बंदी आसतली. हाची अंमलबजावणी करपाक कंपन्यांक एक वर्साचो काळ दिला. उपरांत व्हड रकमेचो दंड कंपन्यांक भरचो पडटलो. नव्या कायद्याचेर ऑस्ट्रेलियांत मतां दिल्यांत. बालहक्क संघटनणांनी कायद्याक विरोध जरी केला तरी पालकांनी ह्या नव्या नेमाक येवकार दिला.
संवसारांत पयलो खर कायदो
-आतां मेरेन अनियंत्रीत सोशल मिडियाचो भुरग्यांचेर जावपी परिणामांचेर फकत संवसारभर चर्चा जाताली.
-फ्रांसा सयत अमेरिकेच्या कांय राज्यांनी भुरग्यांक पालकांच्या परवानगेन सोशल मिडिया खातें उगडपाक मेळटा.
-फ्लोरिडाक १४ वर्सां सकयल्या भुरग्यांचेर पुराय बंदी आसली तरी ताका न्यायालयांत आव्हान दिलां.
-आयतारा ऑस्ट्रेलियेन संमत केल्लो कायदो सगळ्यांत खर अशें मानतात आनी तो जायत्या देशांक मार्गदर्शक थारूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
