भांगरभूंय | प्रतिनिधी
संवसारीक टी-20 क्रिकेट सर्तींतले 38वे मॅचींत येजमान ऑस्ट्रेलियेच्या पंगडान अफगाणिस्तानाक 4 धांवड्यांनी हारयलो. ऑस्ट्रेलियेन जैत जोडलें आसलें तरी ताची सेमी फायनलींत सुवात मेळोवपा विशीं अजून कांयच निश्चीत ना. इंग्लंड आपली निमाणी मॅच खेळपाचो आसा, ताणें आपले निमाणे मॅचींत श्रीलंका पंगडाक हारयलो जाल्यार ऑस्ट्रेलिया आनी इंग्लंड ह्या दोनूय पंगडांचे दरेकी सात गूण जातले आनी अशे स्थितींत इंग्लंड बरे धांवगतीच्या नेटार सेमी फायनलींत पावपाक शकता.
मजगतीं, पयलीं बॅटींग करतना निर्धारीत 20 ओव्हरींनी 8 विकेटी वगडावन 168 धांवड्यो केल्यो. ताका प्रत्युत्तर दितना अफगाणिस्तानान 20 ओव्हरींनी 7 विकेटी वगडावन 164 धांवड्यो केल्यो.
ऑस्ट्रेलिये वतीन ग्लन मॅक्सवेलान सगल्यांत चड 54 धांवड्यो केलक्यो. ताणें 32 बॉलांक तोंड दितना स चवके आनी दोन सके मारले. जाल्यार मिशेल मार्शान 30 बॉलांनी 45 धांवड्यांची खेळी केली. अफगाणिस्तानाच्या नवीन उल हकान तीन आनी फजहलहक फारुकीन दोन विकेटी घेतल्यो. राशिद खान आनी मुजीब उर रहमान हाका दरेकी एक येस फावो जालें.
169 धांवड्यांचें आव्हान घेवन मैदानांत देंवपी अफगाणिस्तानान उस्मान घनीच्या (2) रुपान रोखडीच विकेट वगडायली. पूण, उपरांत रेहमनुल्ला गुरबाझ आनी इब्राहीम झादरान हांणी अफगाणिस्तानाक पावर प्लेंत 40 धांवड्यां मेरेन पावयलो. केन रिचर्डसनान गुरबाझाक 30 धांवड्यांचेर बाद करून ही जोडी फोडली. ते उपरांत आयिल्ल्या गुलबदीन नैईब आनी झादरान हांणी तिसरे विकेटी खातीर 59 धांवड्यांची भागिदारी केली.
अफगाणिस्तानाचो स्कोर 99 आशिल्लो त्या वेळार मॅक्सवेलान नैईबाक 39 धांवड्यांचेर बाद केलो. ते उपरांत अफगाणिस्तानाचो डाव गडगडलो. अॅडम झम्बान 26 धांवड्यो करपी इब्राहीम झादरान आनी नजिबुल्ला झादरान हांकां एकेच ओव्हरींत बाद करून अफगाणिस्तानाची स्थिती 5 बाद 99 अशी केली.
अफगाणिस्तानाचो मुखेली मोहम्मद नबी लेगीत एके धांवडेची भर घालून तंबूंत परतलो. पूण, राशिद खानान डावाची सुत्रां आपल्या हातांत घेतलीं. ताणें 23 बॉलांनी नाबाद 48 धांवड्यो करून मॅच निमाणे ओव्हरी मेरेन व्हेली. अखेरेक ऑस्ट्रेलियेन कसोबसो अफगाणिस्तानाक हारोवपाक येस मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
