भांगरभूंय | प्रतिनिधी
सिरिया, खबरां संस्था :ऑस्ट्रेलियांतल्या फाटलय कांय दसकांतले सगल्यांत भिरांकूळ सामुही फारपेट घडणुकेंत जीव धोक्यांत घालून हल्लो करप्याक निष्प्रभ करपी मूळ सिरियन अहमद अल-अहमद हांणी आपल्या धैर्याक लागून सिरियन नागरिकां विशींची धारणा बदल्ल्या, अशें तांच्या बापायन पत्रकारांक सांगलें.
हल्ल्यांत जखमी जाल्लो अल-अहमद हांच्या शरीरांतल्यो गुळो काडपा खातीर तांचेर शस्त्रक्रिया करतले अशें कुटुंबीयांनी सांगलें. तांच्या ह्या कृत्याक लागून ते सिरियांतल्या तांच्या गांवांत अभिमानाचे प्रतीक थारल्यात.
तांची कृती आमचे खातीर आनी पुराय सिरिया खातीर अभिमानाची गजाल आसा, अशें अल-नैराब (इदलिब प्रांत) हांगचे तांचे काका मोहम्मद हांणी एएफपीक सांगलें.
आयतारा सिडनीच्या बॉन्डी बीच हांगा हनुक्का सुवाळ्याच्या सुरवातेक आयोजीत ज्यू समुदायाचे कार्यावळीचेर हल्लो जालो. ह्या हल्ल्यांत १५ जाणांक मरण आयलें. हल्ल्या मजगतीं अल-अहमद हांणी ल्हवच फाटल्यानच्यान वचून एका हल्लेखोरा कडेन मारपेट केली. तेन्ना तांकां खांद्यार फार लागलो.
सोशल मिडियाचेर प्रसारीत जाल्ल्या व्हिडिओंत, पार्क केल्ल्या वाहनांच्या आड आसरो घेतले उपरांत अल-अहमद एका हल्लेखोराचेर उडी मारून, ताचे कडल्यान पिस्तोल काडून घेतना दिसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
