भांगरभूंय | प्रतिनिधी
मेलबर्न, खबरां संस्था ः भुरग्यांच्या हातांत मोबायल फोन हें पयलीं सावन आसलेंच पूण तेन्ना तें वापरपाक कांय शिस्त आशिल्ली. शाळांनी मोबायल फोनाचेर खर बंदी आशिल्ली. पूण, कोविडांत ऑनलायन शिक्षण जालें आनी मोबायल फोन भुरग्यांच्या हातांत कायमचोच उरलो. भुरग्यांक सोशल मिडिया अॅपाचें व्यसन जालें. मदीं सोशल मिडिया प्लॅटफॉर्मय खूब वाडले. फेसबूक आनी ट्विटरा परस टिकटॉक आनी इंस्टाग्राम रील फुडें गेले. भुरगीं चड वेळ ह्या रिलांत आडखळून पडटात. ह्या हुस्क्याक लागून ऑस्ट्रेलियान 16 वर्सां पिराये सकयल्या भुरग्यांक सोशल मिडिया वापरपाचेर बंदी घालपाची घोशणा केल्या.
ऑस्ट्रेलियान 16 वर्सां सकयल्या भुरग्यांक सोशल मिडिया वापरपाचेर बंदी घालपाचो धोरणात्मक निर्णय घेतला. हाचे खातीर कायदो करतलें. विशेश म्हळ्यार मुखेल विरोधी पक्ष लिबरल पक्षान ह्या निर्णयाक तेंको दिला. देखून ह्या निर्णयाची अंमलबजावणी करपाची वाट आतां मेकळी जाल्या. ह्या निर्णयाची खर अंमलबजावणी करपाक संबंदीत मिडिया वा सोशल मिडिया प्लॅटफॉर्म जापसालदार आसतले. प्रधानमंत्री अँथनी अल्बानीस हांणी ह्या निर्णयाची घोशणा केला. सोशल मिडिया भुरग्यांचे लुकसाण करतात अशें तांणी सांगलें. म्हणल्यार सोशल मिडिया वापरतना पिरायेची मर्यादा हुपली जाल्यार कंपनीं आड कारवाय जातली, भुरग्यांचेर आनी पालकांचेर कारवाय करचे नात. सोशल मिडिया वापरपाची पिराय थारावपा खातीर कायदो करतले. 18 नोव्हेंबर सावन सुरू जावपी अधिवेशनाच्या निमाण्या दोन सप्तकांत हें विधेयक मांडटले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
