भांगरभूंय | प्रतिनिधी
खबरां संस्था
मेलबर्नः सार्बियाोच स्टार टॅनीस खेळगडो नोवाक जोकोविचान ऑस्ट्रेलियन ओपन 2024 सर्तीच्या पयल्या फेरयेंतली आपली मॅच जिखली. 36 वर्सा पिरायेच्या जोकोविचान संवसारीक क्रमवारींत 178वे सुवातेर आशिल्ल्या 18 वर्सा पिरायेच्या क्रोएशियाच्या डिनो प्रिज्मिकाक चार सेटांत 6-2, 6-7 (5), 6-3, 6-4 अशें हारयलें. जोकोवीच आपल्या 25व्या ग्रंड स्लेम किताबा खातीर हे सर्तींत खेळटा.
जोकोविचाक प्रिज्मिकाक हारोवपा खातीर 4 वरां 1 मिनिट लागलीं. पयल्या सेटा उपरांत प्रिज्मिकान सुरवेक सावन जोकिविचाक आव्हान दिलें. ताचे स्पीडीचो ताका त्रास जाता अशें दिसतालें. मात ताणे स्वताक सावरून ही गेम टायब्रेकरा मेरेन व्हेली मात प्रज्मिकान 7-6 अशी जिखली. फाटल्या 17 वर्सांत दुसरे फावट जोकोविचाक पयले मॅचींत एक सेट वोगडावचो पडलो. तिसऱ्या सेटांत प्रज्मिक 2-0 असो फाटीं पडल्लो. मात ताणे स्कोर 2-2 असो केलो. मात जोकिविचान आपल्या अणभवाच्या खुस्तार प्रिज्मिकाक नाचोवपाक सुरवात केली. आनी निमाणे ही मॅच जिखली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
