भांगरभूंय | प्रतिनिधी
पॅरीस, खबरां संस्था: पॅरिसांत चालू आशिल्ल्या ऑलिम्पीक खेळांत भारताचो स्वप्नील कुसळे हांणी इतिहासीक कामगिरी केल्या. भारताच्या स्वप्नील कुसळे (कोल्हापूर ) हाणें ५० मीटर रायफल थ्री-पोझिशन सर्तींत आपल्या नांवार पदक केलां. तांणे कांश्यां पदक मेळयलां. ऑलिंपिकांत भारताचें हें तिसरें पदक. ह्यान पयलीं भारतान शुटिंगांत दोन पदकां जिखल्यांत. मजेची गजाल म्हळ्यार भारतान पयलेच खेपे शुटिंगांत तीन पदकां मेळयल्यांत.
कितले गूण मेळयल्यात?
स्वप्नीलान ४५१.४ गूण मेळोवन कांस्य पदक जिखलें. विशेश म्हळ्यार पात्रताय फेरयेंत पयल्या क्रमांकाचेर आशिल्ल्या चिनच्या लियू हांणी भांगरा पदक मेळयलें. लियु हांणी वट्ट ४६३.९ गूण मेळयले. युक्रेनचो सेरहीय कुशिक हांणी ४६१.३ गूण मेळोवन दुसरो क्रमांक मेळयलो. पयल्या कांय फेरयेंत स्वप्नील सव्या क्रमांकाचेर आशिल्लो. उपरांत तो पांचव्या क्रमांकाचेर पावलो, मागीर ताणें चवथ्या क्रमांकाचेर उडी मारली आनी निमाणे फेरयेंत तिसर्या क्रमांकाचेर थीर उरलो.
पात्रताय फेरयेची कामगिरी
पात्रताय फेरयेंत स्वप्नीलान वट्ट ५९० गूण मेळयल्ले. धिपरां तेंकोवन लक्ष्य करपाच्या प्रकारांत स्वप्नीलान १९८ (९९,९९) पॉयंट्स जोडले. जाल्यार प्रोन वर्गांत तांणी १९७ (९८,९९) गूण मेळयल्ले. उबें रावन शुटींग करपाच्या प्रकारांत तांणी १९५ (९८,९७) गूण मेळयले. पात्रताय फेरयेंत तो सवो आशिल्लो. उपरांत पात्रताय फेरयेंत तांणी तिसरी सुवात मेळयली. हेच सर्तींत भारताचो ऐश्वर्य प्रतास सिंह तोमर ११वे सुवातेर पावलो. उपरांत सर्तींतल्यान भायर पडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
