भांगरभूंय | प्रतिनिधी
सं वसारांतले सगल्या व्हडले खेळां सर्तीक आॅलिंपिकाक
काल म्हळ्यार 26 जुलया सावन फ्रांन्साची राजधानी पॅरिस
शारांत सुरवात जाल्या. ही संवसारांतली सगळ्यांत व्हडली आनी प्रतिश्ठेची खेळां सर्त. देखून ऑलिंपीक सर्तीक ‘खेळाचो कुंभमेळा’ अशें म्हण्टात. कारण ऑलिंपिकांत सगळ्या तरांचे मैदानी खेळ खेळटात. ही सर्त दर चार वर्सांनी जाता. ह्या खेळाच्या कुंभमेळ्यांत संवसारांतले सगले देश वांटो घेतात. फाटले खेपे जपानाची राजधानी टोक्यो शारांत आॅलिंपीक जाल्लें. 10 हजारां परस चड खेळगडे हे सर्तींत वांटो घेवपाक पॅरिसांत जमल्यात.
ह्या ऑलिंपिकांत खेळगडे पदकां जिखपा खातीर आनी खेळां मळार आपल्या देशाचें नांव गाजोवपाक घाम गळयतले. भारतीय खेळगडेय मैदानाचेर तन, मनान खेळून आपल्या देशाचो तिरंगो अभिमानान हुबयतले. भारताच्या पंगडांत 113 खेळगडे आसात आनी तांकां मजत करपाक तांचे परस चड आदार कर्मचारी आसा. फाटले खेपे टोक्यो ऑलिंपीक 2020 वर्सा भारतीय पंगडान बरें काम केल्लें. ताचे आदीं खंयच्याच ऑलिंपिकांत भारतान टोक्यो ऑलिंपिकांत जितलीं पदकां जिखलीं तितलीं पदकां खंयच्याच आॅलिंपिकांत जिखूंक नाशिल्लीं. टोक्यो ऑलिंपिका परस ह्या ऑलिंपिकांत भारताच्या खेळगड्यांक चड पदकां मेळटली अशी आस्त देशांतल्या करोडांनी खेळां मोगींक आसा. अर्थांत खेळगड्यांनीय ते खातीर खूब सराव केला. भारत सरकारान खेळगड्यांक सगळ्यांत बरें प्रशिक्षण आनी सुविधा दिवपाचोय यत्न केलो. खेळगड्यांनी कश्ट करून आपलें फॉर्म तिगोवन दवरलें आनी ऑलिंपिकाची तिकेट मेळयली.
देशा खातीर पदक जिखप हें प्रत्येक खेळगड्याचें सपन. ते खातीर ताणें खूब मेहनत घेतल्या. देशांतल्या 140 कोटी नागरिकांच्यो शुभेत्सा ह्या खेळगड्या फाटल्यान आसात. प्रधानमंत्री नरेंद्र मोदी हांणीय ह्या खेळगड्यांक परबीं दिल्यांत. देशवासी ह्या खेळगड्या कडल्यान पदकांची अपेक्षा करतात आनी चडांत चड पदकां मेळोवपांत ते येसस्वी जातले आनी करोडांनी भारतीयांची अपेक्षा पुराय करतले, हातूंत दुबाव ना.
ऑलिंपिकांत भारताक आतां मेरेन व्हडलेंशें यश मेळूंक ना. ऑलिंपिकांत संवसारांतलीं हेर राश्ट्रां पदकां लुटतात तेन्ना भारतान बोटांचेर मेजपाक मेळटलीं, इतलीं पदकां मेळटात. आमचे परस आंवाठान ल्हान, लोकसंख्येन ल्हान, गरीब देश आमचे इतलींच वा ताचे परस दुपेटीन पदकां जिखतात. भारताच्या राश्ट्रीय खेळाक हॉकीक सगळ्यांत चड पदक मेळ्ळ्यांत. पूण हालीं भारतीय हॉकी पंगडान निराश करपी कामगिरी केल्या. आदल्या टोक्यो ऑलिंपिकांत भारतीय हॉकी पंगडाक कांस्यां पदक मेळ्ळें. राष्ट्रवादी लोकांच्यो भावना घडये दुखावतल्यो म्हूण अशें म्हणपाचें न्हय, पूण फाटल्या वर्सा भारतीय हॉकी पंगडाक कसलीच व्हडली सर्त जिखूंक ना. तरी देशांतल्या लोकांचो हे खेपे भारतीय हॉकी पंगडाचेर विस्वास आसा, की भारतीय हॉकी पंगड आपल्या पदकाचो रंग बदलतलो.
वैयक्तीक खेळांत भारतान हाताच्या बोटांचेर मेजपाक मेळटा तितलीं पदक मेळयल्यांत. वैयक्तीक खेळांत कुस्ती हो भारताचो पयलें पदक जिखपी खेळ. 1952 वर्सा हेलसिंकी ऑलिंपिकांत महाराष्ट्राचे खाशाबा जाधव हांणी कांश्यां पदक जिखिल्लें. ते उपरांत वैयक्तीक खेळांत पदकांचो दुकळ पडलो. हो दुकळ 1998 वर्सा सोंपलो. त्या वर्सा ऑलिंपिकांत लियंडर पेसान (मूळ गोंयकार) टेनिसांत कांस्य पदक जिखलें. तेन्ना सावन भारतान दर एका ऑलिंपिकांत दोन, तीन पदकां जिखल्यांत. भारतान आतां मेरेन वैयक्तीक खेळांत फकत दोन भांगरा पदकां मेळयल्यात. शूटर अभिनव बिंद्रान 2008 वर्सा बीजिंग ऑलिंपिकांत देशाचें पयलें भांगरा पदक जिखलें. ताचे बारा वर्सां उपरांत नीरज चोपडान 2020 वर्साच्या टोक्यो ऑलिंपिकांत भांगरा पदक जिखलें. 140 कोटी लोकसंख्या आशिल्ल्या देशांत फकत दोन भांगरा पदकां आसप ही अभिमान बाळगुपाची गजाल न्हय. भारताचो भांगरा पदकांचो दुकळ हे खेपे तरी सोंपता अशी आस्त देशांतल्या लोकांक आसा. इतलेंच न्हय तर भारतीय खेळगडे बरे कामगिरी करतले आनी ऑलिंपिकांत चडांत चड पदकां मेळयतले अशेंय तांकां दिसता. कारण हे खेपे भारतीय खेळगडे बऱ्या फॉर्मांत आसात. तांणी हो फॉर्म तिगोवन दवरून आपली सगळ्यांत बरी कामगिरी केल्यार पॅरिस ऑलिंपिक भारता खातीर इतिहासीक थारतलें.
फाटल्या ऑलिंपिका परस भारतीय पंगडाक ह्या ऑलिंपिकांत चड जैत मेळटलें असो अदमास खेळां पंडितांनी उक्तायला. भारतांतल्या भोवतेक सगल्या खेळां संघटनांचेर राजकी फुडारी आसतात. तातूंतल्या कांय जाणांक खेळाचो गंधय नासता. फक्त मिरोवपाक, चार पयशे वा नाका जाल्लें करपाक (उदा. बायलां कुस्ती) ते कदेलां आडावन बसतात. जर खेळां संघटनांचेर फक्त आंतरराष्ट्रीय खेळां सर्तींत वांटो घेतिल्ल्या खेळगड्यांकूच स्थान मेळ्ळें आनी ते राजकी फुडाऱ्यांच्या चेपणा खाला ये नासतना स्वतंत्र निर्णय घेवंक लागले जाल्यार भारतीय पंगडांचेर पदकांचो पावस पडटलो. ह्या आॅलिंपिकांत कुस्ती, शूटिंग, धनुर्विद्या, वजन उखलप, बाॅक्सिंग, टेबल टेनिस, बॅडमिंटन, भालो फेक ह्या खेळांत भारताक सगळ्यांत चड पदकां मेळटलीं अशी अदमास आसा. भारतीय खेळगडे भारतवासीयांच्या अपेक्षांक पाळो दितले आनी पॅरिस स्पोर्ट्स सिटींत भारतीय तिरंगो अभिमानान हुबयतले हातूंत दुबाव ना. भारतीय पंगडाक परबीं!
लक्ष दवरपा सारके भारतीय खेळगडे
पी. व्ही. सिंधू (बॅडमिंटन), नीरज चोप्रा (भालो फेक), मीराबाय चानू (वेटलिफ्टिंग), लोवलिना बोर्गोहेन (बाॅक्सिंग), हाॅकी पंगड, अविनाश साबळे (शर्यत), सिफ्त कौर सामरा (शुटिंग), रोहन बोपण्णा, एन श्रीराम (लाॅन टेनीस), अंतिम फागल (कुस्ती), दीपिका कुमारी (धनुर्विद्या).
लक्ष दवरपा सारके कांय विदेशी खेळगडे
सिमोन बायल (अमेरिका- जिमनेस्ट), राफायल नादार (स्पेन- लाॅन टेनिस), शॅनी एन फ्रेझर प्रायस (जमैका- शंबर मिटर शर्यत), व्हिक्टर व्हेबानयामा (फ्रान्स- बास्केटबाॅल पंगडांतलो खेळगडो, तो सात फूट चार इंच उंच आसा), कालेब ड्रेसल (अमेरिका- शंबर मिटर पेंवप), इल्युड किपचोगे (केन्या- मॅराथोन शर्यत), लिब्रोन जेम्स (अमेरिका- बास्केटबाॅल पंगड), कॅती लेडेकी (अमेरिका- पेंवप), नाओमी ओसाका (जपान- लाॅन टेनिस), स्काॅय ब्रावन (स्केट बोर्डींग).
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
