भांगरभूंय | प्रतिनिधी
मुंबयः ऑपरेशन सिंदूर खातीर आमकां आमच्या भारतीय सशस्त्र दळाचो खूब अभिमान आसा. भारत एकवटीत उबो आसा, संकल्पान उग्र आनी उद्देशान अविचल आसा, सगळ्या प्रकारच्या आतंकवादाच्या दुस्वासा आड. प्रधानमंत्री नरेंद्र मोदी हांच्या धाडसी आनी निर्णायक फुडारपणा खाला भारतीय सशस्त्र दळान शिमेवयल्यान येवपी दरेका चिथावणीक अचूकतायेन आनी शक्तीन जाप दिल्या, अशें रिलायन्स इंडस्ट्रीज लिमिटेडचे अध्यक्ष आनी वेवस्थापकीय संचालक मुकेश अंबानी हांणी म्हणलें. आतंकवादा मुखार भारत शांत रावचो ना आनी आमच्या भुंयेचेर, आमच्या लोकांचेर वा आमच्या देशाची राखण करपी धाडसी व्यक्तींचेर कसलेच हल्ले आमी मान्य करचे नात, हें प्रधानमंत्री मोदी हांच्या फुडारपणान दाखोवन दिलां. आमच्या शांततायेक कसलोय धोको आसल्यार ताका खर आनी निर्णायक उपाय येवजण करून जाप दितले, हें हालींच्या घडणुकांनी दाखोवन दिलां, अशेंय अंबानी हांणी म्हणलें. आमच्या राश्ट्राची एकवट आनी अखंडताय राखपी खंयचेय कारवायेक आदार करपाक रिलायन्स कुटुंब तयार आसा. आमच्या वांगडी भारतीयां भशेन आमी मानतात की भारताक शांततायेची इत्सा आसा, पूण ताच्या अभिमान, सुरक्षीतताय वा सार्वभौमत्वाच्या मोलाचेर न्हय. एकठांय जावन आमी उबे रावतले. आमी झगडटले. आनी आमी जैतिवंत जातले, अशेंय निमाणें अंबानी हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
